Ներկայիս իշխանությունը մեկ տարի առաջ հայտարարում էր, որ ուժայինները պետք է խորհրդարանին հաշվետու լինեն, սակայն հիմա նրանք ճիշտ հակառակն են ասում: Հունվարի 21-ին Ազգային ժողովում ճեպազրույցի ժամանակ այս մասին ասաց «Լուսավոր Հայաստան» խորհրդարանական խմբակցության քարտուղար Գեւորգ Գորգիսյանը:
Նրա խոսքով՝ ներկայիս իշխանությունը հայտարարում է, որ Ոստիկանությունը եւ ԱԱԾ-ն, այնուամենայնիվ, չպետք է խորհրդարանի ենթակայության ներքո լինեն, սակայն մեկ տարի առաջ, երբ նրանք ընդդիմությունում էին, Արարատ Միրզոյանը պահանջում էր, որ դրանք ԱԺ-ին հաշվետու լինեն:
«Այլ կերպ ասած նրանք կարող են իշխանության ձեռքում ռեպրեսիվ զենք լինել: Այժմ, խորհրդարանի խոսնակ դառնալով, Միրզոյանը փոխեց իր կարծիքը: Իհարկե, դեռ չի կարելի վստահ ասել, որ ներկայիս իշխանություններն այդ կերպ կօգտագործեն Ոստիկանությանը եւ ԱԱԾ-ն: Սակայն մենք պետք է հարցին ինստիտուցիոնալ լուծում տանք,այլ ոչ թե իշխանության այս կամ այն ներկայացուցիչների բարի կամքին հույս դնենք», - հավելեց նա:
Միեւնույն ժամանակ նա հիշեցրեց, որ Ոստիկանությունը եւ ԱԱԾ-ն կառավարությունից հանել է երկրորդ նախագահ Ռոբերտ Քոչարյանը: Ըստ պատգամավորի, նա դա արել է երկու պատճառով. Առաջին հերթին դրանք սեփական վերահսկողության տակ առնելու համար, իսկ երկրորդ, որպեզի կոալիցիոն կառավարության բանակցությունների ժամանակ դրանց ոչ մի կուսակցական ուժ չհավակնի:
«Նախորդ խորհրդարանում Նիկոլ Փաշինյանը ղեկավարում էր մեր ընդհանուր «Ելք» խմբակցությունը: Նա այն ժամանակ էլ դեմ էր արտահայտվում դրան՝ քննադատելով սուպերվարչապետական համակարգը: Այս խոսքերը հնչում էին նաեւ կուսակցական նիստերին, որոնց ձայնագրությունները պահպանվել են», - նկատեց Գորգիսյանը:
Ըստ պատգամավորի՝ համոզիչ չէ նաեւ իշխանությունների այն փաստարկը, որ Ոստիկանության եւ ԱԱԾ-ի գործունեությունը գաղտնի տարրեր է պարունակում, հետեւաբար խորհրդարանին հաշվետու լինելու մասին խոսք չի կարող լինել:
«Ոչ ոք չի խնդրում հատուկ գործողությունների ընթացիկ մանրամսները բացահայտել: Բանակն էլ բոլորովին հանրային չէ: Այնուամենայնիվ, ՊՆ-ն հաշվետու է խորհրդարանին որպես ԶՈՒ-ն ձեւավոևրող մարմին», - ասաց Գորգիսյանը:
