Հնդկաստանում առյուծները կերել են մի տղամարդու, ով մտել է նրանց վանդակը՝ հայտնում է Lenta-ն՝ վկայակոչելով Times now news-ին։
Հունվարի 20-ին, կեսօրից հետո, հնդիկն առանց տոմսի ներթափանցել է Մոխալի քաղաքի գազանանոց եւ մտել ասիական առյուծների վանդակը։ Դրա համար նա ստիպված է եղել հաղթահարել մի քանի մետրանոց ցանկապատը, որի վրա փշալարեր են եղել։
Դա նկատել են ավտոբուսների վարորդները, որոնք զբոսաշրջիկներին գազանանոց են տանում։ Նրանք շտապօգնություն, ոստիկանություն են կանչել եւ պատմել են, որ հնդիկին մոտ տասը րոպե հոշոտում էին երկու առյուծներ։ Վանդակում գտնվող մյուս երկու առյուծները դրան չեն մասնակցել։
Տուժածին հանել են վանդակից եւ տեղափոխել հիվանդանոց, սակայն բժիշկներին չի հաջողվել փրկել նրա կյանքը։ Նրանք ասել են, որ տղամարդը աջ աչքի եւ պարանողի ուժեղ վնասվածքներ է ստացել, ինչպես նաեւ՝ կրծքավանդակի եւ ազդրի կտրվածքներ՝ հայտնում է The Indian Express-ը։
Միջադեպից հետո գազանանոցը ժամանակավորապես փակել են։ Մահացածի մոտ չի եղել ո՛չ բջջային հեռախոս, ո՛չ փաստաթղթեր։ Արտաքինից տղամարդը 22-25 տարեկան է։
Ասիական առյուծները միայն Հնդկաստանի տարածքում են ապրում եւ մեռնող տեսակ են համարվում։ 2015թ․ տվյալներով՝ աշխարհում մնացել է ընդամենը 523 ասիական առյուծ։