Ռուսաստանից ժամանած զբոսաշրջիկների մեծ մասը գալիս է Հայաստան` զվարճանալու, նարգիլե ծխելու, ինչը հեշտ հասանելի է հանրապետությունում: Այս մասին հունվարի 21-ին լրագրողների հետ հանդիպման ժամանակ հայտարարել է գործարար Ժորա Փանոսյանը:
Գործարարի ասելով, ինքը հաճախ է առիթ ունենում շփվելու ռուս զբոսաշրջիկների հետ, եւ նրանք բազմիցս շեշտել են, որ Հայաստանը նման է դրախտի: «Համեմատած տարածաշրջանի շատ այլ երկրների հետ՝ մեր ծառայությունների մակարդակը, նարգիլեի պատրաստման ձեւերը, պայմանները, գնային մատչելիությունը եւ շատ այլ բաներ մրցակցությունից դուրս են, եւ այս հարցերում մենք առաջատար ենք: Եվ հիմա ցանկանում են մեզ առաջարկել հրաժարվել նարգիլեանոցներից: Եվ ի՞նչ: Դուք առաջարկում եք զբոսաշրջիկներին ցույց տալ Գառնին, Գեղարդը եւ վե՞րջ: Այն կտեւի երկու օր, իսկ հետո՞: Ռուս զբոսաշրջիկը գալիս է այստեղ հաճույքների մատչելիության համար: Մենք չպետք է զրկենք զբոսաշրջիկներին դրանից», - ասել է Փանոսյանը: