Մեծ Բրիտանիան ողջունել է ԵՄ պատժամիջոցները Ռուսաստանի Հետախուզությունների գլխավոր վարչության դեմ՝ նշելով, որ դա Կրեմլի համար կոշտ ուղերձ է, հաղորդում է Reuters-ը:
«Այսօրվա պատժամիջոցները ցույց են տալիս կոշտ գործողություններ կատարելու մեր վճռականությունը՝ ի պատասխան Ռուսաստանի ռազմական հետախուզական կազմակերպություն ՀԳՎ-ի անպատասխանատու գործունեության, որն անցյալ տարի Մեծ Բրիտանիայի քաղաքացիներին լուրջ վտանգի ենթարկեց Սոլսբերիում», - հայտարարել է Մեծ Բրիտանիայի արտգործնախարար Ջերեմի Հանթը:
Ինչպես ավելի վաղ էր հաղորդվել, Եվրամիության խորհուրդը քիմիական զենքի նոր ռեժիմի համաձայն պատժամիջոցներ է սահմանել ինը անհատների եւ կազմակերպությունների դեմ: Ինչպես նշվում է, պատժամիջոցների կիրառումը կապված է անցյալ տարվա մարտին Սոլսբերիում տեղի ունեցած թունավորման հետ, երբ ՀԳՎ նախկին գնդապետ Սերգեյ Սկրիպալը եւ նրա դուստր Յուլիան ենթարկվեցին նյարդապարալիտիկ նյութի ներգործությանը։
«Այս ցուցակը ներառում է ՀԳՎ-ի երկու պաշտոնյաների, ինչպես նաեւ վարչության ղեկավարին եւ նրա տեղակալին, ովքեր պատասխանատու են թունավոր նյարդապարալիտիկ նյութերի պահպանման, փոխադրման եւ կիրառման համար», - հաղորդում է «Գազետան»: