Կերչի նեղուցում երկու նավերի վրա հրդեհի հետեւանքով զոհերի թիվը հասել է 10-ի՝ հայտնում է РБК-ն։ Եւս 14 նավաստիների հաջողվել է փրկել։
Տանզանիայի դրոշով երկու նավեր հունվարի 21-ի երեկոյան այրվել են Կերչի նեղուցի շրջանում։ Երկու նավերն էլ կայանված են եղել չեզոք ջրերում։ ՏԱՍՍ-ի աղբյուրի համաձայն, նրանք խարիսխ են գցել։ «Այդ խարսխային կայանատեղին անօրինական է»,- ասել է գործակալության աղբյուրը։
«Ռոսմորրեչֆլոտ»-ի տվյալներով, նրանցից մեկի վրա պայթյուն է տեղի ունեցել, որից հետո կրակն անցել է երկրորդ նավին։ Ավելի վաղ հայտնի էր դարձել միջադեպի հետեւանքով երեք զոհված նավաստիների մասին։
«Կանդի» նավի վրա գտնվել է 17 մարդ, որոնցից 9-ը Թուրքիայի քաղաքացիներ, 8-ը՝ Հնդկաստանի։ «Մաեստրո» նավի վրա եղել է 14 մարդ, 7 Թուրքիայի եւ 7 Հնդկաստանի քաղաքացիներ՝ հայտնում է ՏԱՍՍ-ը՝ հավելելով, որ միջադեպը նեղուցում նավագնացության վրա չի ազդել։