ՀՀ քաղաքաշինության կոմիտեի նախագահ Ավետիք Էլոյանի նախաձեռնությամբ նոր թափ է հաղորդվել նախորդ տարի մեկնարկած ծրագրին:
Քաղաքաշինության կոմիտեից NEWS.am-ին հայտնում են, որ Ծրագրով առաջարկվում է «Սեւան» ազգային պարկի Լճաշեն-Սեւանի թերակղզի հատվածում հանգստի եւ զբոսաշրջության գործառույթների զարգացման համար կտրուկ փոխել ինչպես տարածքին առնչվող իրավական կարգավորումները, այնպես էլ տարածքի գոտեւորման եւ կառուցապատման սկզբունքները՝ ստեղծելով ներդրումների համար գրավիչ պայմաններ:
Քաղաքաշինության կոմիտեի նախագահի համոզմամբ, նախագիծը խթանելու է ներդրումային ծրագրերի հոսքը տարածաշրջան:
Ստեղծվելու է գործառույթների այնպիսի համադրություն եւ գործառնական գոտիների հերթագայություն, որը բնականոն կերպով փոխանցելու է զարգացումը մի գոտուց դեպի մյուսը, ինչպես նաեւ խթանելու է ամբողջ համակարգի ինքնազարգացումը:
Ընդունելով գծային զարգացման սկզբունքը՝ ծովափնյա հետիոտն ճեմուղու երկայնքով ստեղծվելու են քոթեջային, հյուրանոցային կառուցապատման գոտիներ, ընդմիջելով դրանք՝ առեւտրի, սպասարկման, սննդի օբյեկտների, լանդշաֆտային զբոսայգիների, մանկական պարկերի, ակտիվ հանգստի եւ զվարճանքի գոտիներով:
Խոսքը մոտ 10 կմ երկարություն ունեցող լճափնյա հետիոտն ճեմուղու մասին է (promenade), որը ծառայելու է կառուցապատումից ազատ (լողափնյա տարածքներ, բնական լանդշաֆտ) եւ կառուցապատվող գոտիների բաժանիչ գիծ: