Հնդկաստանի Ուտար Փրադեշ նահանգի Շահջահանփուր քաղաքում նորածին աղջկա են փրկել, ում ծնողները ողջ-ողջ թաղել էին հոգեւորականի պահանջով, հայտնում է Daily Mail պարբերականը:
Տանտրայի քուրմը 20 օրական աղջկա ծնողներին համոզել է, որ նա դիվահար է: Նա պնդել է, որ տանը նրա ներկայությունը նրանց կյանքը կփչացնի: Դրանից հետո նրանք որոշել են դստերը թաղել: Մոր քույրը աղջկան տարել է լճակի մոտ եւ նրան փոսի մեջ է դրել:
Մի քանի ժամ հետո, երբ օդի ջերմաստիճանը նվազել է մինչեւ 3 աստիճան, մանկական լացի ձայնը լսել է մի անցորդ: Նա արագ գտել է լացի ակունքը եւ հանել սառած երեխային: «Այսպիսի դաժանություն: Չեմ պատկերացնում, թե ինչպես կարելի էր երեխային թողնել նման ցրտին»,- ասել է նրան գտած անցորդը:
Աղջիկը հիվանդանոցում է, վիճակը կայուն է: Հոգեւորականին, հորը, մոր քրոջը եւ նրա ամուսնուն կալանավորել են: Մորը հաջողվել է թաքնվել, նրան որոնում են:
