ՀՀ Ազգային ժողովի նախագահ Արարատ Միրզոյանը հունվարի 22-ին ընդունել է ՀՀ-ում Շվեդիայի Թագավորության արտակարգ եւ լիազոր դեսպան Ուլրիկ Թիդեստրոմին: Ողջունելով հյուրին, խորհրդարանի ղեկավարը, արժեւորել է երկու երկրների միջեւ հաստատված համագործակցությունը` մասնավորապես կարեւորելով օրենսդիր մարմինների շփումները, փոխայցերն ու փորձի փոխանակումը: Միրզոյանըը համոզմունք է հայտնել, որ այսուհետ եւս միջազգային տարբեր հարթակներում խորհրդարանական պատվիրակությունների միջեւ փոխգործակցությունը կշարունակվի: Անդրադառնալով Լեռնային Ղարաբաղի հակամարտության կարգավորման գործընթացին՝ ԱԺ նախագահը, նշել է, որ Հայաստանի իշխանությունների դիրքորոշումն այս հարցում միանշանակ է, եւ հարցի լուծումը հնարավոր է համարում բացառապես խաղաղ ճանապարհով` ԵԱՀԿ Մինսկի խմբի համանախագահության շրջանակում։
Միրզոյանը նաեւ շնորհակալություն է հայտնել Շվեդիայի Ռիգսթագին` Հայոց ցեղասպանությունը դատապարտող բանաձեւի ընդունման համար: Ուլրիկ Թիդեստրոմը համոզմունք է հայտնել, որ հայ-շվեդական համագործակցությունը կընդլայնվի տարբեր ոլորտներում, կամրապնդվեն կապերը ոչ միայն միջխորհրդարանական համագործակցության համատեքստում, այլ նաեւ խորհրդարանների գլխավոր քարտուղարների եւ աշխատակազմերի մակարդակով: Դեսպանը վստահեցրել է, որ իր երկրի խորհրդարանը չի ուշացնի Հայաստան-Եվրամիություն Համապարփակ եւ ընդլայնված գործընկերության համաձայնագրի վավերացումը: