Իրանի Ագն-ը անհիմն է համարել Գերմանիայի կողմից իրանական Mahan Air ավիաընկերության չվերթների արգելումը՝ հայտնում է ԻՌՆԱ-ն։
ԻԻՀ ԱԳՆ ներկայացուցիչ Բահրամ Հաշեմիի խոսքերով, Mahan Air ավիաընկերության հանդեպ Գերմանիայի արգելքը հիմնված է ոչ ճիշտ տեղեկատվության վրա, որ ներկայացրել են նրանք, ում դուր չեն գալիս Թեհրանի եւ Բեռլինի լավ հարաբերությունները։
Հաշեմին վկայակոչել է Mahan Air-ի լավ վարկանիշը եւ հույս է հայտնել, որ Գերմանիան կվերանայի իր որոշումը։
Գերմանիան Mahan Air-ին արգելել է աշխատել երկրի օդանավակայաններում։
Գերմանիայի դաշնային ավիացիոն վարչության ներկայացուցիչները Mahan Air-ին Գերմանիայից եւ Գերմանիա ուղեւորատար չվերթները դադարեցնելու մասին ծանուցում են ուղարկել։
Mahan-ը, որ մեծությամբ Իրանի երկրորդ ավիաընկերությունն է Iran Air-ից հետո, շաբաթական չորս չվերթներ էր իրականացնում Թեհրանի եւ գերմանական Դյուսելդորֆ ու Մյունխեն քաղաքների միջեւ։