Վենեսուելայի մայրաքաղաք Կարակասի Լիբերտադոր շրջանում երեքշաբթի երեկոյան տեղի ունեցած բողոքի ակցիաներում շուրջ երեք տասնյակ մարդ է ձերբակալվել, հաղորդում է «El Nacional» թերթը՝ վկայակոչելով դեպքերի ականատեսին:
Ըստ նրա, ոստիկանները եւ Ազգային գվարդիայի զինյալները փորձել են ցրել ցուցարարներին՝ արցունքաբեր գազով եւ ռետինե փամփուշտներով: Ավելի ուշ, բախման վայրում հայտնվել է «հատուկ ստորաբաժանման գրոհայինների երկու մեքենա, որոնք կրակ են բացել ցուցարարների վրա»: «Կարծեմ մի մարդ սպանվել է, բայց նրա անունը դեռ հայտնի չէ, եւ 30 հոգու ձերբակալեցին», - ասել է ականատեսը: Ավելի վաղ Վենեսուելայի խորհրդարանի պատգամավոր Ժոզե Մանուել Օլիվարեսը Twitter-ի իր էջում հաղորդել էր ցույցերի ընթացքում մեկ զոհի եւ հինգ վիրավորի մասին:
Կարակասում եւ երկրի մի քանի այլ քաղաքներում երեքշաբթի երեկոյան հակակառավարական ցույցեր են սկսվել՝ նախագահ Նիկոլաս Մադուրոյի դեմ ընդդիմության կողմից կազմակերպված լայնածավալ բողոքի ցույցերի նախօրեին:
2017թ.-ին Վենեսուելան մի քանի ամիս շարունակ ցնցեցին բողոքի ցույցերը: Դրանց ընթացքում զոհվեց առնվազն 120 մարդ, հազարավորներ վիրավորվեցին, ավելի քան 5 հազար մարդ ձերբակալվեց, հաղորդում է TASS-ը:.