Հունվարի 21-ին խավարման ժամանակ Լուսնի վրա երկնաքար է ընկել: Դա նկատել է Reddit կայքի օգտատերը, դիմել մասնագետներին՝ այս իրադարձության մանրամասն ուսումնասիրման համար, հաղորդում է «Գազետա»-ն:
Երկնաքարն ընկել է Լուսնի տեսանելի կողմի արեւմտյան մասում, Բյուրգի հինավուրց խառնարանի տարածքում: Ինչպես պարզվել է, շատերը, ովքեր դիտում էին խավարումը, նկատել են անկումը, բայց ոչ բոլորն են հասկացել, թե հատկապես ինչ է տեղի ունեցել: Ոմանք Լուսնի պատկերի փոփոխությունը համարել են լուսանկարչական խոտանի հետեւանք:
Փորձագետների կարծիքով անհանգստության պատճառ չկա: Ամեն տարի շարունակ Լուսնի վրա շուրջ 10 մ-ից ավելի տրամագծով մոտ 140 նոր երկնաքարային խառնարաններ են հայտնվում, սակայն սա առաջին անգամն է, որ երկնաքարը հնարավոր է եղել արձանագրել խավարման ժամանակ: Մոտ ապագայում աստղագետները նախատեսում են ավելի մանրամասն ուսումնասիրել երկնաքերի անկումը եւ ստանալ նոր խառնարանի լուսանկարները:
Լուսնի վրա մթնոլորտ չկա, որի մեջ կայրվեին փոքր ասուպները։ Բացի այդ, արբանյակի պայմանները թույլ են տալիս խառնարաններին պահպանվել միլիոնավոր տարիների ընթացքում․ այստեղ չկա անձրեւ, տեկտոնիկ շերտերի շարժում: Այս ամենը թույլ է տալիս գիտնականներին եզրակացություններ անել, թե որքան երկնաքար է ընկել Երկրի վրա՝ նրա գոյության ընթացքում: