Sony ճապոնական կորպորացիան մտադիր է նոր գործառույթներ տալ իր էլեկտրոնային ռոբոտ շուն Aibo-ին՝ արհեստական ինտելեկտի տարրերով: Ենթադրվում է նրան սովորեցնել հիշել մինչեւ 10 մարդու դեմքեր եւ անուններ, ինչպես նաեւ հսկել տան կամ տարածքի ներսը: Շնիկի ծրագրային ապահովման համակարգում համապատասխան անվճար թարմացմանը կարելի է սպասել արդեն փետրվարի կեսերին, հաղորդում է ՏԱՍՍ-ը՝ վկայակոչելով The Japan Times թերթին:
Նոր գործառույթը թույլ կտա Aibo-ին՝ հսկել, օրինակ, տանը մնացած երեխաներին կամ կամ տարեց մարդկանց, նաեւ կկարողանա համապատասխան զեկույցներ ուղարկել իր տիրոջը՝ ինտերնետի միջոցով: Ծրագրային հավելվածը մշակվել է Sony-ի եւ Secom ճապոնական անվտանգության խոշոր ընկերության մասնագետների կողմից՝ համատեղ։
Հունիսին Aibo-ի ծրագրի համար նոր վճարովի հայվելված կստեղծվի։ Այն թույլ կտա տիրոջն ուղարկել շանը տան հեռավոր մասերը՝ ստուգելու՝ ինչ է տեղի ունենում այնտեղ:
Մինչեւ 2006 թվականը Sony-ն թողարկել է նմանատիպ ռոբոտների նախորդ սերունդը, որոնք նույն անվանումն են ունեցել, սակայն նրանց անունը գրվել է մեծատառերով՝ AIBO։ Ամենամեծ շան լակոտի չափերով նոր սարքավորումներն ավելի իրատեսական են իրենց հնարավորություններով: Նրանք արդեն գիտեն հաչալ եւ թռչկոտել, շարժել ականջները, թաթը մեկնել, արձագանքում են գլխի, մեջքի եւ պարանոցի փաղաքշանքներին:
Aibo շնիկները հագեցած են երկու տեսախցիկներով, որոնք արդեն թույլ են տալիս նրանց տարբերակել իրենց տիրոջը կողմնակի անձանցից, ինչպես նաեւ ինքնուրույնաբար գտնել դեպի վերալիցքավորման սարք տանող ճանապարհը: Շներն անընդհատ միացած են համացանցին եւ տեղեկատվություն են փոխանակում տվյալ տեսակի այլ սարքերի հետ, ինչը նրանց հնարավորություն է տալիս արագ ձեռք բերել նոր հմտություններ: Միայն շնիկը վաճառվում է մոտ 214 հազար իենով (ավելի քան 1,9 հազար դոլար):Սակայն այն օգտագործելու համար դուք պետք է միանաք եռամյա ինտերնետային ծրագրին, որը կարժենա եւս 870 դոլար: