ՀՀ տնտեսական զարգացման եւ ներդրումների նախարար Տիգրան Խաչատրյանը հանդիպել է չինացի ներդրողների հետ։
Նախարարությունից NEWS.am_ին հայտնում են, որ նախարարը ողջունել է հյուրերին եւ նշել, որ ներդրողներն ունեն նախարարության լիակատար աջակցությունն այն գործընթացներում, որտեղ կզգան պետության օժանդակության կարիքը։ Նախարարը ներկայացրել է նաեւ ներդրումային ծրագրերի համար պետության աջակցության գործիքակազմը եւ դրա կիրառման ձեւերը։
«Xinjiang Zheng Yi Agriculture Science and Technology CO» ՍՊԸ-ի խորհրդի նախագահ Լի Սյենմինը նախարարի ուշադրությանն է ներկայացրել Կոտայքի մարզում վերելակների հավաքման արտադրամաս հիմնելու ներդրումային ծրագիրը, որը նախատեսում է տարեկան ավելի քան 2000 վերելակի արտադրություն, ընդ որում՝ արտադրական գործընթացի մեծ մասը կազմակերպելով Հայաստանում։ Ընկերության ներկայացուցիչներն իրենց հուզող հարցերն են ուղղել նախարարին։
«Higer Bus Company Limited» ՍՊԸ-ի ԱՊՀ երկրների ուղղության տնօրեն Ջան Ցիֆան իր հերթին ներկայացրել է տրանսպորտային ցանցի բարելավման եւ ավտոբուսների ներկրման ծրագիրը։
Հանդիպման ավարտին նախարար Տիգրան Խաչատրյանը եւս մեկ անգամ պատրաստակամություն է հայտնել աջակցելու ներդրողներին եւ քննարկելու իրենց հուզող խնդիրները, նաեւ հավելել է․ «Հուսով ենք, մեկնարկող ծրագրերի արդյունքներն այնքան ոգեւորիչ կլինեն ձեզ համար, որ դուք կմտածեք Հայաստանում նոր, ավելի խոշոր ծրագրեր նախաձեռնելու մասին»։