ՀՀ երրորդ նախագահ Սերժ Սարգսյանի եղբորորդու՝ Հայկ Սարգսյանի դեմ ցուցմունք տված «Կենտրոնի Կյաժ» մականունով հայտնի Դավիթ Սիմոնյանին առանձնապես խոշոր չափերով թմրամիջոցներ իրացնելու մեջ մեղադրվող Էդուարդ Ղազարյանը կշարունակի մնալ կալանքի տակ։ Նման որոշում այսօր՝ հունվարի 24-ին կայացրեց Երեւանի ընդհանուր իրավասության դատարանի դատավոր Տաթեւիկ Գրիգորյանը՝ մերժելով Ղազարյանի պաշտպան Արամյանի ներկայացրած գրավի միջնորդությունը։ Այսօրվա դատական նիստին հետազոտվեցին գործով ապացույցները։ Մասնավորապես հայտնի դարձավ, որ խուզարկությամբ Էդուարդ Ղազարյանի բնակարանից հայտնաբերվել է 6 հրացան, փամփուշտներ՝ զենքի թույլտվության վկայականներով։
Ղազարյանը հայտարարել է, որ հայտնաբերված հրացանները որսորդական են։ Հրապարակված արձանագրություններից հայտնի դարձավ, որ խուզարկություն է կատարվել նաեւ Ղազարյանի՝ Նորագյուղում գտնվող տանը, որտեղից եւս երկու հրացան է հայտնաբերվել։ Նշենք, որ ըստ մեղադրանքի՝ Էդուարդ Ղազարյանն ապօրինի ձեռք է բերել եւ պահել առանձնապես խոշոր չափերով բուպրենորֆին, հաշիշ եւ մարիխուաննա տեսակի թմրամիջոցներ, որոնք 2017թ. դեկտեմբերի 19-ին Երեւան քաղաքի Նորագյուղի տարածքում ապօրինի իրացրել է Դավիթ Սիմոնյանին:
Նշենք, որ Էդուարդ Ղազարյանը չի ընդունում առաջադրված մեղադրանքը։
Առաջադրված մեղադրանքը մասնակի է ընդունել միայն գործով նախկին ամբաստանյալ Գոռ Համբարձումյանը, ում նկատմամբ քրեական հետապնդումը դադարեցվել է համաներման կապակցությամբ։