Հռոմի պապ Ֆրանցիսկոսը կրկին անդրադարձել է համացանցին՝ օգտատերերին, առաջին հերթին երիտասարդներին կոչ անելով առաջնորդվել քրիստոնեական համայնքների կենսական սկզբունքներով, փոխանցում է «ՌԻԱ Նովոստի»-ն:
«Հարկ է ընդունել, որ համացանցը, մի կողմից, ծառայում է մեզ իրար ավելի ուժեղ կապելուն, միմյանց օգնելուն, բայց մյուս կողմից՝ օգտագործվում է նաեւ անձնական տեղեկությունների մանիպուլացման համար քաղաքական կամ տնտեսական իմաստով օգուտ ստանալու նպատակով՝ առանց անձին եւ նրա իրավունքները հավուր պատշաճի հարգելու»,- նշված է հինգշաբթի Վատիկանում հրապարակված սոցիալական հաղորդակցության 53-րդ Համաշխարհային կաթոլիկ օրվա առիթով պապական ուղերձում:
Ֆրանցիսկոս պապն այս կապակցությամբ նշել է, որ վիճակագրական տվյալներով՝ համացանցի առավել երիտասարդ օգտատերերից յուրաքանչյուր չորրորդը ենթարկվում է, այսպես կոչված, «կիբեռբուլիզմի», այսինքն՝ համացանցում տարեկիցների կողմից ագրեսիվ ճնշման:
Հռոմի պապի խոսքով՝ համացանցը կարող է ծառայել ինչպես հանրության շրջանում հաղորդակցության բարելավմանը, այնպես էլ անհատի ինքնամեկուսացմանը: Նման վտանգն առանձնապես մեծ է դեռահասների շրջանում: Այս խնդիրը բարձրացնում է էթիկական, սոցիալական, իրավաբանական բնույթի բազմաթիվ հարցեր, որոնք չի կարող անտեսել նաեւ եկեղեցին, շեշտեց նա:
Խոսելով համացանցում գոյություն ունեցող վիրտուալ միությունների մասին՝ Ֆրանցիսկոս պապը բերել է քրիստոնեական միությունների օրինակը, որոնց անդամները ոչ թե ուղղակիորեն հետեւում են ընդհանուր հավատին եւ հայացքներին, այլեւ իսկապես մեկը մյուսի կարիքն ունեն:
