Այս փուլում ԵՄ-ի տրամադրած միջոցներն արդյունավետորեն են իրացվել: Հունվարի 25-ին Երեւանում ԵՄ ֆինանսավորմամբ տարերային աղետների վտանգների նվազեցման ծրագրի արդյունքների ամփոփման ժամանակ այս մասին ասաց Հայաստանում Եվրամիության պատվիրակության ղեկավար, դեսպան Պյոտր Սվիտալսկին:
Նրա խոսքով՝ ԵՄ կարեւոր նպատակն է արտակարգ իրավիճակների դեպքում կառավարման հարցում Հայաստանին աջակցության ցուցաբերումը, որն ուղղված է երկրի հնարավորությունների մեծացմանը՝ ինչպես կառավարության, այնպես էլ տեղական մակարդակով: «Եվրամիությունը վերջին 25 տարում Հայաստանում մոտ 50 մլն եվրո է ներդրել տարերային աղետների դեպքում կառավարման համար, եւ մենք շարունակում ենք ու կշարունակենք այս ուղղությամբ աջակցություն ցույց տալ»,- ասաց Սվիտալսկին:
Ընդ որում՝ նա նշեց, որ SEPA շրջնակային համաձայնագիրը քաղաքացիական պաշտպանության վերաբերյալ մի ամբողջ բաժին է նախատեսում, եւ հավելեց, որ մոտ ապագայում իրենք Հայաստանի արտակարգ իրավիճակների նախարարության հետ կսկսեն ընդհանուր 1 մլն եվրո գումարի ծավալուն թվինինգային ծրագրի իրականացումը:
Ի հավելումն՝ դեսպանը հայտնեց, որ իրենք ծրագրում են իրականացնել մոտ 6 մլն եվրո ընդհանուր գումարի տարածաշրջանային ծրագիր տարերային աղետների վտանգների կառավարման եւ վտանգների նվազեցման ուղղությամբ:
Պյոտր Սվիտալսկին ընդգծեց, որ Հայաստանում արդեն իրականացվել է SEPA համաձայնագրի 80 տոկոսը, եւ իրենք պատրաստվում են այն հասցնել մինչեւ տրամաբանական ավարտ: