ՀՀ քննչական կոմիտեի նախագահ Հայկ Գրիգորյանն այսօր՝ հունվարի 25-ին ընդունել է Հայաստանում ԱՄՆ դեսպանատան ռազմական համագործակցության ծրագրի ղեկավար Ստեֆեն Չուի գլխավորած պատվիրակությանը։ Այս մասին հայտնում են ՀՀ քննչական կոմիտեի մամուլի ծառայությունից։
Հայկ Գրիգորյանը բարձր է գնահատել ԱՄՆ դեսպանատան հետ ձեւավորված համագործակցությունը, Քննչական կոմիտեին՝ ձեւավորման պահից, ցուցաբերված աջակցությունը, որի շնորհիվ անցած տարիների ընթացքում կյանքի են կոչվել Քննչական կոմիտեի՝ որպես անկախ քննչական մարմնի, կարողությունների զարգացման ուղղված մի շարք հավակնոտ ծրագրեր:
Մասնավորապես՝ ԱՄն դեսպանատան Թմրամիջոցների դեմ պայքարի եւ իրավապահ համագործակցության գրասենյակի աջակցությամբ ներդրվել է քրեական գործերի նյութերի թվայնացման ծրագիրը, մշակվել էլեկտրոնային գրադարանը, էլեկտրոնային նախաքննությունը, կազմակերպվել ՔԿ ծառայողների մասնագիտական ունակությունների զարգացմանն ուղղված տարբեր դասընթացներ, սեմինարներ։
Ստեֆեն Չուն փաստել է, որ ՔԿ նախագահի առաջիկա այցը Ամերիկայի Միացյալ Նահանգներ եւ մասնակցությունը «Նոր աշխարհակարգի մարտահրավերները եւ հնարավորությունները» աշխատաժողովին կարող է էապես նպաստել փոխգործակցության զարգացմանը, փորձի փոխանակմանը, նախանշել նոր ուղղություններ։
Աշխատաժողովը տեղի կունենա 2019 թվականին փետրվարի 4- 8-ը՝ Վաշինգտոնում, որին կմասնակցեն Մերձավոր Արեւելքի, Հարավային Ասիայի երկրների ներկայացուցիչները։
