Հռոմի պապ Ֆրանցիսկոս Առաջինն «անիմաստ եւ անպատասխանատու» է անվանել միգրանտների ստիգմատացումը եւ նրանց՝ որպես հասարակության համար հիմնական սպառնալիք ներկայացնելը, հայտնում է Reuters–ը։ Նման հայտարարությամբ Հռոմի պապը հանդես է եկել Պանամա իր այցի ընթացքում՝ Կաթոլիկ եկեղեցու կողմից նշվող Երիտասարդության համաշխարհային օրը ելույթ ունենալով երկրի մայրաքաղաքում։ «Մենք ուզում ենք լինել եկեղեցի, որն աջակցում է մյուս մշակույթներին, պաշտպանում եւ ինտեգրում է, որը չի ստիգմատացնում»,– ասել է նա։ Գործակալությունը նշում է, որ միգրանտների վերաբերյալ Հռոմի պապի խոսքերը, կարծես, ԱՄՆ իշխանությունների միգրացիոն քաղաքականության հակակշիռ են հնչել։ Հիշեցնենք, որ մի քանի ժամ առաջ ԱՄՆ նախագահ Դոնալդ Թրամփը հրամանագիր է ստորագրել շաթդաունի դադարեցման մասին, որը տեղի էր ունեցել Մեքսիկայի եւ ԱՄՆ սահմանին պատի կառուցման առնչությամբ երկրի իշխանությունների տարաձայնությունների հետ կապված։
