Բո անունով լաբրադորը, որը քանզասցի Կայլ եւ Լաուրա Քրիերների շունն էր, անհետ կորել էր. տերերը նրան փնտրում էին օրուգիշեր, տեղեկացնում է Daily Mail-ը։
Ինչպիսին էր նրանց զարմանքը, երբ մի քանի օր հետո Բոն հայտնվեց, ընդ որում՝ ոչ թե մենակ, այլ ուրախ ընկերակցությամբ։ Շունը տուն էր բերել մեկ այլ լաբրադոր եւ այծ։
Կայլի խոսքով՝ ինչ-որ մեկը զանգահարել էր իր կնոջն ու տեղեկացրել, որ ճանապարհին երկու լաբրադոր է տեսել. սպիտակ եւ սեւ, ինչպես նաեւ մի շեկ այծ։
Երբ ամուսինները գնացին բերելու իրենց շանը, նրան էին միացել մեկ այլ լաբրադոր եւ ուրախ ու խաղացկուն մի այծ, որոնք անմիջապես թռան Քրիերների մեքենայի մեջ։
Շուտով ցանցում հայտնվեց հուզիչ տեսանյութ տերերի ու շան հանդիպման մասին։
