ԱԺ «Լուսավոր Հայաստան» խմբակցության ղեկավար Էդմոն Մարուքյանը ԵԽԽՎ-ում 2 կարեւոր հանձնաժողովներում է ընդգրկված։ Այս մասին այսօր՝ հունվարի 28-ին, լրագրողների հետ զրույցում ասաց Մարուքյանը։
«Եվրոպական դատարանի դատավորների ընտրության հանձնաժողովում եմ ես ընդգրկված, նշանակվել եմ որպես հիմնական անդամ, սա նշանակում է, որ 47 անդամ երկրներից ձեւավորվող եվրոպական դատարանի ապագա դատավորների թեկնածուներին ընտրելու ենք 20 հոգով եւ այդ 20-ից մեկը ես եմ լինելու, սա շատ կարեւոր լծակ է մեր պետության, մեր պատվիրակության եւ ինձ համար։ Մյուսը մոնիթորինգի հնաձնաժողովն է, որը մոնիթորինգի է ենթարկում 47 անդամ երկրները Մարդու իրավունքների, ժողովրդավարության եւ իրավունքի չափանիշների ստուգման առումով եւ գիտենք, որ Հայաստանը նույնպես մոնիթորինգի տակ է եւ այսօր Հայաստանից մոնիթորինգի հանձնաժողովում որեւէ մեկն ընդգրկված չէ»,- ասաց նա։
Մարուքյանը նշեց, որ 2 հանձնաժողովներն էլ շատ կարեւոր են, ինքը նշանակվել է իր քաղաքական խմբից, այսինքն ALDE խմբի կողմից։
«Այդ հնարավորությունը պետք է ծառայեցվի ի շահ մեր հնարավորություների մեծացման եւ ԵԽԽՎ-ում տարածում մարդու իրավունքների, ժողովրդավարության եւ մարդու իրավունքների պաշտպանության, սա է մեր առաքելությունը»,- ասաց նա։