Անգլիայի բանկը հրաժարվել է մեկնաբանել լրատվամիջոցների տեղեկություններն այն մասին, որ իր ղեկավարությունը որոշում է ընդունել չբավարարել Վենեսուելայի նախագահ Նիկոլաս Մադուրոյի խնդրանքը 1,2 մլրդ դոլարի ոսկու ձուլակտորները երկրին վերադարձնելու մասին:
Երկուշաբթի ՏԱՍՍ-ին տված մեկնաբանության մեջ բանկի ներկայացուցիչը նշել է, որ ֆինանսական ինստիտուտն իրավունք չունի հրապարակել գաղտնի տեղեկությունները:
«Անգլիայի բանկը տարբեր բանկային ծառայություններ է մատուցում, այդ թվում՝ մեծ թվով հաճախորդների ոսկու պահպանման: Բանկը հաճախորդների հետ իր փոխհարաբերություններին վերաբերող մեկնաբանություններ չի տալիս, որոնց նկատմամբ պահպանվում են գաղտնիության կանոնները,- նշված է մեկնաբանության մեջ: - Ցանկացած գործունեություն իրականացնելիս Բանկը պահպանում է ռիսկերի կառավարման ամենաբարձր ստանդարտները եւ հետեւում է բոլոր անհրաժեշտ օրենսդրական նորմերին՝ ներառյայ գործող ֆինանսական պատժամիջոցները»:
Անցյալ շաբաթ Bloomberg գործակալությունը հայտնել էր Մադուրոյի հայցով Անգլիայի բանկի պահուստարաններում պահվող վենեսուելական ոսկին չվերադարձնելու Բանկի որոշման մասին: Գործակալությունը նշել էր, որ դրա պատճառը ԱՄՆ որոշ պաշտոնատար անձանց, այդ թվում՝ ԱՄՆ նախագահի ազգային անվտանգության հարցերով խորհրդական Ջոն Բոլթոնի եւ պետքարտուղար Մայքլ Պոմպեոյի խնդրանքն էր օգնել «կտրել արտասահմանյան ակտիվներին վենեսուելական ռեժիմի հասանելիությունը»: