ԵՏՄ-ում Հայաստանի նախագահությունը խորհրդանշական է, սակայն դա նաեւ առիթ է կառույցում ավելի եռանդուն աշխատելու համար եւ փորձելու ԵՏՄ-ին նոր խթան եւ ուժ հաղորդել: ՌԲԿ հեռուստաալքին տված հարցազրույցում այս մասին ասել է ՀՀ վարչապետ Նիկոլ Փաշինյանը:
«Մենք այդպես էլ տրամադրված ենք: Գլխավոր առաջնահերթությունը ԵՏՄ-ում առկա խոչընդոտների վերացումն է: Ցավոք, ԵՏՀ-ն կարծում է, որ Եվրասիական տնտեսական համայնքի տարածքում ինտեգրվելու համար մոտ 80 խոչընդոտ կա: Այդ խոչընդոտները կապված են օրենսդրության, կարգավորումների հետ եւ բացի այս դե յուրե գոյություն ունեցող խոչընդոտների, կան նաեւ դե ֆակտո խոչընդոտներ: Եվ մեր գլխավոր նպատակն այդ խոչընդոտների, գոնե, մի մասի վերացումն է: Եթե հաջողվի բոլոր խոչընդոտները վերացնել, ապա շատ լավ կլինի»,- նշել է Փաշինյանը:
Լրագրողի դիտարկմանը, որ դա ԵՏՄ-ում թավշյա հեղափոխություն կլինի, Փաշինյանը նշել է, որ ԵՏՄ տարածքում այնքան էլ չեն սիրում եւ գնահատում հեղափոխություն բառը:
«Այնպես որ, ես չեմ օգտագործի այդ բառը»:
