17 եվրագոտու երկրների կենտրոնական բանկերը դադարեցրել են 500 եվրոյի թղթադրամների թողարկումը, իսկ մայիսին բոլոր 19 երկրներն այլեւս չեն շրջանառի այդ անվանմամբ նոր թղթադրամները, հաղորդում է Euro-plus-ը:

500 եվրոյի թղթադրամներն ամենախոշոր եվրոթղթադրամներն են: Եվրոպական կենտրոնական բանկը որոշել է դրանք աստիճանաբար դուրս բերել շրջանառությունից, քանի որ կեղծարարները հատկապես դրանք են կեղծում, ինչպես նաեւ այդ թղթադրամներն օգտագործվում են անօրինական կանխիկ գործարքների համար (500 եվրոյով մեկ միլիոն եվրոն կշռում է ընդամենը 2.2 կիլոգրամ, իսկ նույն գումարը՝ դոլարով ամենախոշոր թղթադրամներով՝ 6 անգամ ավելի):

ՄԻայն Գերմանիան եւ Ավստրիան են այն երկրները, որտեղ դեռեւս մի քանի ամիս կթողարկվեն 500 եվրո արժողությամբ թղթադրամներ: Այդ երկրներում հաճախ են օգտվում կանխիկ գումարից, նույնիսկ մեքենայի նման մեծ գնումների համար:

500 եվրոյի թղթադրամներով դեռեւս կարելի է վճարել: Չկա ճշգրիտ ամսաթիվ, թե երբ շրջանառությունից դուրս կգան դրանք․ բանկերը աստիճանաբար կփոխարինեն դրանք ավելի մանր թղթադրամներով։

Վերջին ամսվա ընթացքում եվրագոտի մտած բոլոր թղթադրամների ընդամենը  2.3 տոկոսն են կազմել 500 եվրոյի թղթադրամները։