Ես անձամբ չեմ կարդացել ԵԽ մարդու իրավունքների հանձնակատարի զեկույցը, հետեւաբար չեմ կարող մեկնաբանել, որովհետեւ, անկեղծ ասած խիստ կասկածում եմ, որ էդպիսի ձեւակերպում լինի: Այս մասին այսօր՝ հունվարի 30-ին, լրագրողների հետ զրույցում նշեց ՀՀ վարչապետ Նիկոլ Փաշինյանը՝ անդրադառնալով ԵԽ մարդու իրվունքների հանձնակատար Դունյա Միյատովիչի զեկույցին, որտեղ ՀՀ իշխանություներին կոչ է արվում Մարտի 1–ի գործով բացառել վրեժի քաղաքականությունը կամ ընտրովի արդարադատությունը:
Ինչ վերաբերում է վերջերս հանրության շրջանում տարբեր շրջանակների կողմից շրջանառության մեջ դրված «Տարածքներ խաղաղության դիմաց» թեզին, Փաշինյանն ասաց. «Մենք չենք կարող ընդհանրապես քննարկել, նույնիսկ քննարկել «տարածքներ խաղաղության դիմաց» բանաձեւը»:
Իսկ դիտարկմանը, թե որոշ փորձագետներ զուգահեռներ են տանում Արցախի հարցում գործող իշխանության եւ Լեւոն Տեր-Պետրոսյանի իշխանության ուղեգծերի մեջ, վարչապետը պատասխանեց. «Մեր կառավարությունը Ղարաբաղի հարցում վարում է մի քաղաքականություն, որը նախկինում ոչ մի կառավարություն չի վարել եւ որեւէ զուգահեռ գտնելու փորձերը նախկինում վարված որեւէ քաղաքական ուղեգծի հետ միանգամից ասեմ, կատարյալ մոլորություն է»: