Al Jazeera-ն 25 րոպեանոց ֆիլմ է պատրաստել Հայաստանի բնապահպանության, մասնավորապես՝ այն վտանգների մասին, որ կարող է առաջանալ Ամուլսարի հանքավայրի շահագործումից։ Ինչպես նշվում է ֆիլմում, Հայաստանի նոր վարչակազմը լուրջ երկընտրանքի առջեւ է կանգնած՝ արժի արդյոք վերսկսել բազմամիլիարդանոց նախագծի իրականացումը երկրի հարավում։
«Կողմնակիցները կարծում են, որ դա կարող է Հայաստանին շահ բերել՝ արտասահմանյան ներդրումների եւ աշխատատեղերի տեսքով։ Սակայն դրա դեմ հանդես է գալիս ակտիվիստների եւ ցուցարարների գնալով ավելի արդյունավետ դարձող կոալիցիան, որ նախազգուշացնում է, թե նախագիծը հսկայական վնաս կպատճառի շրջակա միջավայրին եւ ավելի մեծ վտանգի կենթարկի աշխարհի հազվագյուտ եւ գեղեցիկ կենդանիներից մեկին՝ կովկասյան հովազին»,- նշում են հեղինակները։
Ֆիլմում ներկայացված են կարճ հատվածներ Հայաստանի նախագահ Արմեն Սարգսյանի, վարչապետի տիկին Աննա Հակոբյանի, «Լիդիան Արմենիա» ընկերության տնօրեն Հայկ Ալոյանի եւ տեղի բնակիչների հետ հարցազրույցներից։