Թբիլիսիում բավարարված են հայ-վրացական հարաբերությունների ներկա մակարդակով: Այս մասին Վրաստանի ԱԳ նախարար Գրիգոլ Վաշաձեն հայտարարել է «Ազատություն» ռադիոկայանին տված հարցազրույցում:
«Մենք պարբերաբար հանդիպումներ ենք անցկացնում բոլոր մակարդակներում. ընդ որում, դրանք ոչ թե հերթապահ հանդիպումներ են կամ բարեկամության ու եղբայրության մասին կովկասյան խոստումներ, այլ շատ կոնկրետ, օգտակար եւ անհրաժեշտ հանդիպումներ, որոնց ընթացքում մենք քննարկում ենք համագործակցության հարցեր ենթակառուցվածքների, էներգետիկայի, տրանսպորտի, գիտության ու մշակույթի ոլորտներում»,- նշել է Վաշաձեն:
Դիտարկմանը, թե վրաց-ռուսական հարաբերությունները շարունակում են լարված մնալ, իսկ Ռուսաստանը Հայաստանի ռազմավարական դաշնակիցն է, Վրաստանի ԱԳ նախարարն արձագանքել է, որ Ռուսաստանի հետ հարաբերությունները որեւէ այլ երկրի հետ քննարկել չի ցանկանում: Նա ընդգծել է, որ այդ հարցը վերաբերում է բացառապես այդ երկրին եւ որեւէ կերպ չի ազդի հայ-վրացական հարաբերությունների վրա:
«Վերջերս, մեկ շաբաթ առաջ մեր երկրի վարչապետը Հայաստանում էր, երկու վարչապետները հանդիպեցին ու քննարկեցին բոլոր հարցերը, որոնք հուզում են երկու կողմերին: Ուստի, հավատացեք, որ եթե բնութագրենք հայ-վրացական հարաբերությունները, ես կասեի, որ փաստացի, դա ռազմավարական գործընկերություն է»,- հայտարարել է Վաշաձեն:
