Հայաստանի արտաքին գործերի նախարարությունը օտարերկրյա լրագրողների համար հանրապետությունում աշխատելու խոչընդոտներ չի ստեղծում։ Այս մասին փետրվարի 5-ին լրագրողների հետ հանդիպմանն ասել է Հայաստանի արտաքին գործերի նախարարության մամուլի քարտուղար Աննա Նաղդալյանը։
Նրա խոսքով՝ ադրբեջանական Turan տեղեկատվական գործակալության (գործակալությունն ընդդիմադիր է- խմբ.) լրագրողը Հայաստանում է բացառապես լրագրողական գործունեություն իրականացնելու համար։ «Արտաքին գործերի նախարարությունը Հայաստանում լրագրողական գործունեություն իրականացնելու թույլտվության հայց է ստացել։ Համապատասխան լրագրողական ընթացակարգեր անցնելուց հետո թղթակցի հայցը բավարարվել է»,- պարզաբանել է Նաղդալյանը։ Նա ավելացրել է, որ ադրբեջանցի թղթակիցը մեր երկիր է եկել իր խմբով, եւ Հայաստանի ԱԳՆ-ն դա միանգամայն բնական է համարում։ «Ամեն օր տարբեր երկրներից տասնյակ լրագրողներ են դիմում Հայաստանի արտաքին քաղաքական գերատեսչություն՝ հավատարմագիր ստանալու համար»,- ասել է նա։