Ղարաբաղյան հակամարտության կարգավորման հարցով բանակցությունները կարող են վարվել միայն ԵԱՀԿ Մինսկի խմբի ձեւաչափով: Փետրվարի 5-ին լրագրողների հետ հանդիպման ժամանակ այս մասին ասաց քաղաքագետ Սուրեն Սարգսյանը:
Ըստ նրա՝ չի կարելի խոսել պետությունների ղեկավարների մակարդակով որեւէ բանակցության առկայության մասին այնքան ժամանակ, քանի դեռ հանդիպումը չի կազմակերպել ԵԱՀԿ ՄԽ-ն: «Այսօրվա դրությամբ կարելի է խոսել միայն Հայաստանի եւ Ադրբեջանի ԱԳ նախարարների մակարդակով բանակցությունների մասին: Կարելի է ասել, որ ընթանում է ճանաչողական փուլ: Հենց սրա հետ է կապված այն փաստը, որ իշխանության ներկայացուցիչները հաճախ խուսափում են պատասխանել հարցին՝ օրակարգից հանվա՞ծ են Մադրիդյան սկզբունքները, թե՞ ոչ»,- նշեց փորձագետը:
Նա հավելեց, որ «տարածքներ խաղաղության դիմաց» ձեւակերպումը ոչ մի կերպ չի բխում Հայաստանի շահերից, եւ բանակցությունները պետք է վարել ելնելով հենց այս տրամաբանությունից: «Ցանկացած դեպքում, բանակցությունները պատերազմից նախընտրելի են»,- եզրափակեց Սարգսյանը: