Հարկային նոր օրենսգրքով 6 հիմնական փոփոխություն է առաջարկվում, բնականաբար, կան մտահոգություններ: Այս մասին NEWS.am-ի հետ զրույցում նշեց ԱԺ ԲՀԿ խմբակցության պատգամավոր, տնտեսագետ Միքայել Մելքումյանը:
Նրա խոսքով, փոփոխություններից մեկն այն է, որ շրջանառության հարկից ավելացված արժեքի դաշտ անցման շեմը պահպանվում է տարեկան 115 մլն դրամի սահմանում, ինչը հունվարի 1-ից նվազել էր՝ դառնալով 58,35 մլն դրամ:
«115 մլն դրամի շեմը պահպանելու հետ կապված ես նախորդ տարի երկու օրենսդրական նախաձեռնություն էի ներկայացրել, որոնք չէին ընդունվել, սակայն նոր օրենսգրքով պարզվում է՝ պահպանվում է: Ինձ համար անհասկանալի է, որ կառավարությունը մերժում է իմ առաջարկությունը, բայց նույն բանն ինքն անում է: Հիմա հունվարի 1-ից այդ շեմն իջել է 58,35 մլն դրամի եւ պետք է տեսնել, թե արդյոք Հարկային օրենսգրքի 115 մլն դրամի շեմը տարածվելո՞ւ է հունվարի 1-ից»,-հայտարարեց Մելքումյանը:
Հաջորդ դրույթը, ըստ նրա, վերաբերում է միկրոձեռնարկատիրությանը, ըստ որի մինչեւ 24 մլն դրամ շրջանառության դեպքում տնտեսվարողները բոլոր հարկերից ազատվում են: Ընդ որում դա չի տարածվում Երեւանում բոլոր տեսակի առեւտրի օբյեկտների եւ չի տարածվում մարզերում տոնավաճառներում եւ հիպերմարկետներում գործող տնտեսվարողների վրա. «Ես կարծում եմ, որ այդ շեմը պետք է բարձրացվի մինչեւ 30-35 մլն դրամի: Դրա բացատրությունն այն է, որ 24 մլն դրամի դեպքում շահութաբերության մակարդակը օրական կտրվածքով շատ փոքր թիվ է անում՝ 3-5 հազար դրամ: Այդ գնով անգամ բանվորները աշխատանք չեն կատարում: Այսինքն այստեղ պետք է տրամաբանություն լինի, թե ինչ շեմ ենք սահմանում»:
Հաջորդ հանգամանքը կապված է արտոնագրային վճարները վերացնելու հետ. «Մասնավորապես, դա վերաբերում է փաստաբաններին, հաշվապահներին, իրավաբաններին եւ այստեղ պետք է այնպես վերաբերվել, որ տաքսու վարորդները, վարսավիրանոցները, ատամնաբույժները, որոնք արտոնագրային հարկի տեսքով էին աշխատում եւ դա շրջանառության հետ չէր կապվում: Հիմա պետք է հասկանալ, թե արդյոք այդ շրջանառությունը հնարավոր է լինելու ամբողջական ֆիքսել: Արդյունքում մենք կարող է ավելի վատ բան ստանանք, քան կար: Պետք է կառավարությունը համոզի, ապացուցի, որ ինքն ի վիճակի է ամբողջ շրջանառությունն արձանագրի: Այսինքն այդ ոլորտներում ստվերային տնտեսությունը բացառելու հանգամանքը պետք է ապացուցվի: Պետք է հասկանանք, թե վարչարարական գործիքների արդյունավետությունն ինչպիսին է»:
Հաջորդ խնդիրը, ըստ ԲՀԿ-ական պատգամավորի, շրջանառության հարկի տոկոսադրույքն է, որովհետեւ օրինակ հանրային սննդի օբյեկտներում, պանդոկներում շրջանառության հարկը 5-ից դարձել է 8 տոկոս, իսկ հաջորդ տարվա սկզբից լինելու է 10 տոկոս. «Իսկ 10 տոկոս շրջանառության հարկն ավելի բարձր է, քան եթե աշխատես ավելացված արժեքի հարկով: Փաստաբանների ու հաշվապատների, իրավաբանների մասով սա հանգեցնում է փոքր ու միջին բինզեսի ծառայությունների գների աճի: Այսինքն եթե ես այս ոլորտներում հարկային բեռ եմ փոփոխում, ուրեմն փոքր ու միջին բիզնեսը, որ օգտվում է այդ ծառայություններից, այդ դեպքում իր ծախսերն էլ են մեծանալու: Դրա ազդեցությունը պետք է հասկանալ»,-ասաց Մելքումյանը: