Հայաստանի Հանրային ծառայությունները կարգավորող հանձնաժողովը փետրվարի 6-ի նիստում նախազգուշացրել է «Գազպրոմ Արմենիա» ՓԲԸ-ին:
Որոշման մեջ նշված է, որ «Գազպրոմ Արմենիա» ՓԲԸ-ն Հրազդանի ՋԷԿ-ի 5-րդ էներգաբլոկի 2018 թվականի նոյեմբերի գործունեության մասին տեղեկությունները ներկայացրել է 2018-ի դեկտեմբերի 28-ին՝ խախտելով սահմանված ժամկետները: Հանձնաժողովի կողմից սահմանված ժամկետների խախտման փաստով քննություն անցկացնելու նպատակով ընկերության դեմ հարուցվել է վարչական վարույթ, ինչի մասին «Գազպրոմ Արմենիա» ՓԲԸ-ն իրազեկվել է:
«Ընկերությունը պարտավոր էր արժանահավատ համարվող տեղեկությունների հիման վրա տեղեկատվությունը ներկայացնել Հանձնաժողով և հետագայում ճշգրտումներ կատարել: Ընկերության հիմնավորումը տեղեկությունները սահմանված ժամկետից ուշ ստանալու մասին օբյեկտիվ պատճառ չի կարող համարվել: Հիմք ընդունելով «Էներգետիկայի մասին» օրենքի 42-րդ հոդվածի 1-ին եւ 4-րդ մասերը՝ Հանձնաժողովը որոշեց.
1. «Գազպրոմ Արմենիա» ՓԲԸ-ին նախզգուշացնել,
2. «Գազպրոմ Արմենիա» ՓԲԸ-ն այս որոշումը բողոքարկելու իրավունք ունի այն ուժի մեջ մտնելուց հետո 3 ամսվա ընթացքում՝ Հանձնաժողով կամ Վարչական դատարան,
3. որոշումն ուժի մեջ է մտնում իրազեկելուց հետո հաջորդ օրը»: