Կառավարությունն այսօրվա՝ փետրվարի 6-ի նիստում որոշում կայացրեց արտոնություն տրամադրել «Լիկվոր» փակ բաժնետիրական ընկերությանը։

Որոշման նպատակն է թույլատրել «ԼԻԿՎՈՐ» փակ բաժնետիրական ընկերությանն օգտվել գերակա ոլորտում իրականացվող ներդրումային ծրագրի շրջանակներում ներմուծվող տեխնոլոգիական սարքավորումները, դրանց բաղկացուցիչ ու համալրող մասերը, հումքը եւ նյութերը ներմուծման մաքսատուրքից ազատելու արտոնությունից։

Տնտեսական զարգացման եւ ներդրումների նախարար Տիգրան Խաչատրյանը նշեց, որ «Լիկվոր» ՓԲԸ-ն հանդիսանում է ստերիլ դեղամիջոցներ արտադրող ընկերություն, գործում է քիմիական արդյունաբերության բնագավառում, որն արդյունաբերության ենթաոլորտ է: Համաձայն Հայաստանի Հանրապետության 2014-2025թթ. հեռանկարային զարգացման ռազմավարական ծրագրի` արդյունաբերությունը հանդիսանում է գերակա ոլորտ:

Ընկերության կողմից ներմուծվող ապրանքներն օգտագործվելու են ստերիլ դեղամիջոցների, ակնակաթիլների արտադրության մեջ։

Նախատեսվում է ծրագրի շրջանակում իրականացնել 7,6 մլրդ դրամի ներդրում, որն ուղղված է լինելու հումքի, նյութերի, օժանդակ նյութերի, տեխնոլոգիական սարքավորումների եւ դրանց բաղկացուցիչ մասերի ներմուծմանը: Նախատեսվում է ներդրումային ծրագրի շրջանակում ստեղծել 8 նոր աշխատատեղ՝ 75 500 ՀՀ դրամ միջին աշխատավարձով։

Ծրագրով նախատեսված արտադրանքի ընդհանուր ծավալը կկազմի  մոտ 13 մլրդ դրամ, որից 3,8 մլրդ դրամի արտադրանքը կիրացվի ՀՀ տարածքում, 1 մլրդ դրամի արտադրանքը կարտահանվի ԵՏՄ այլ երկրների տարածք, 8 մլրդ դրամի արտադրանքը կարտահանվի երրորդ երկրներ:

Ներմուծվող ապրանքները չեն ներմուծվում ԵՏՄ անդամ-երկրներից, քանի որ չեն բավարարում ընկերության տեխնիկական պահանջներին։