Գյումրիում անշարժ գույքի շուկայական գինը շարունակում է ընկնել: Ոլորտի մասնագետների պնդմամբ, բնակարանները շարունակում են էժանանալ: Անցած 2 տարիների համեմատությամբ, գրեթե 40 տոկոսով անշարժ գույքի շուկայական արժեքն ընկել է: Նկատվում է նաեւ հետաքրքիր մի միտում, որ Գյումրիում կամ Շիրակի մարզում վաճառում են բազմասենյականոց բնակարանները, գնում ավելի փոքր բնակարաններ: Միջին հաշվով 20 վաճառվող բնակարանին մեկ գնորդ է բաժին ընկնում:
Այն, որ բնակարանի գները Գյումրիում էժան է, պատճառներից մեկն էլ միգրացիան է, համոզված են անշարժ գույքի գործակալները. Հայաստանից մեկնողները շատ են:
Բացի այդ ,վաճառում են բազմասենյականոց սեփական տները եւ ձեռք բերում 1 կամ 2 սենյականոց փոքրիկ բնակարան:
Ըստ մասնագետների, Գյումրիում բազմասենյականոց բնակարաններ ձեռք են բերում հիմնականում ռուս զինվորականների ընտանիքները:
2008-2009-ին բազմասենյականոցներ գնում էին նաեւ գյուղերի բնակիչները: Հատկապես Ախալքալաքի գյուղերից էին գալիս Գյումրի, իսկ վճարունակ գյումրեցիներին ձեռք է տալիս հաճախ բնակարան ձեռք բերել Երեւանի ոչ կենտրոնական մասերում:
