Հռոմի պապ Ֆրանցիսկոսը առաջին անգամ ընդունել է, որ միանձնուհիների նկատմամբ կաթոլիկ եկեղեցում սեռական բռնություններ են կատարվել, տեղեկացնում է Gazeta-ն՝ հղում կատարելով BBC-ին։
Մերձավոր Արեւելք կատարած պատմական այցելության ժամանակ Ֆրանցիսկոս պապն ասել է, որ հոգեւորականները պղծել եւ բռնություններ են կիրառել միանձնուհիների նկատմամբ եւ նրանցից ոմանց պահել են սեռական ստրկության մեջ։ Այդ պատճառով կանանց որոշ կրոնական համայնքներ կազմաքանդվել են, իսկ հոգեւոր անձինք՝ հեռացվել։
Նա նշել է, որ եկեղեցին գիտի այս խնդրի մասին եւ փորձում է լուծել այն, բայց դա «դեռեւս շարունակվում է»։
2018թ. նոյեմբերին ողջ աշխարհի կաթոլիկ միանձնուհիներին ներկայացնող կազմակերպությունը նույնպես հրապարակային հայտարարություն է արել «լռության եւ գաղտնիության մշակույթի» մասին, որը խանգարել է իրենց արտահայտվել սեռական բռնության մասին, եւ կանանց կոչ է արել տեղեկացնել նման դեպքերի մասին։
Ավելի վաղ Վատիկանի Women Church World կանանց ամսագիրը դատապարտել է բռնությունը՝ հայտարարելով, որ որոշ դեպքերում միանձնուհիները ստիպված են եղել հղիություն ընդհատել կամ թողնել քահանաների երեխաներին, ինչը կաթոլիկությունն արգելում է։