Ռոբերտ Քոչարյանին կալանքից ազատ արձակելու վերաբերյալ պաշտպանական կողմի ներկայացրած բողոքը մերժելու վերաբերյալ Վերաքննիչ քրեական դատարանի դատավոր Մնացական Հարությունյանի որոշումը Քոչարյանի փաստաբանաները կբողոքարկեն ՀՀ Վճռաբեկ դատարանում։ Այս մասին այսօր՝ փետրվարի 7–ին Վերաքննիչ քրեական դատարանում լրագրողների հետ զրույցում հայտարարեց ՀՀ երկրորդ նախագահ Ռոբերտ Քոչարյանի փաստաբանական թիմի անդամ Հայկ Ալումյանը։ Նա նշեց, որ փաստաբանական խումբը Քոչարյանի գործով ՄԻԵԴ ներկայացվելիք երրորդ գանգատում կներառի նաև Վերաքննիչ քրեական դատարանի կայացրած այսօրվա որոշումը՝ շեշտը դնելով Քոչարյանի՝ քաղաքական հետապնդման ենթարկվելու հանգամանքի վրա։
«Ես պաշտոնապես հայտարարում եմ, որ Ռոբերտ Քոչարյանը քաղբանտարկյալ է, և Եվրոպական դատարան ներկայացվելիք գանգատում այս դրույթին անդրադառնալու ենք»,–ասաց նա։
Հիշեցնենք, որ այսօր՝ փետրվարի 7–ին ՀՀ վերաքննիչ քրեական դատարանը՝ դատավոր Մնացական Հարությունյանի նախագահությամբ կայացրեց մերժել ՀՀ երկրորդ նախագահ Ռոբերտ Քոչարյանի պաշտպանների բողոքն ու անփոփոխ թողնել Քոչարյանի կալանքի ժամկետը երկարաձգելու առաջին ատյանի դատարանի որոշումը։
Հիշեցնենք, որ Երեւան քաղաքի ընդհանուր իրավասության դատարանի դատավոր Արթուր Մկրտչյանը հունվարի 18-ին բավարարել էր Հատուկ քննչական ծառայության քննիչի միջնորդությունը՝ Ռոբերտ Քոչարյանին կալանքի տակ պահելու ժամկետը երկարացնելու վերաբերյալ եւ մերժել՝ պաշտպանների միջնորդությունը Ռոբերտ Քոչարյանի նկատմամբ որպես խափանման միջոց ընտրված կալանքն այլընտրանքային խափանման միջոց գրավով փոխարինելու մասին: Այս որոշումը պաշտպանական կողմը բողոքարկել էր ՀՀ վերաքննիչ քրեական դատարանում՝ պահանջելով վերացնել Ռոբերտ Քոչարյանի նկատմամբ որպես խափանման միջոց ընտրված կալանքը և նրան կալանքից ազատ արձակել, հակառակ դեպքում՝ գրավի կիրառումը ճանաչել թույլատրելի և որոշում կայացնել՝ կալանքը գրավով փոխարինելու մասին:
Երկրորդ նախագահը «Մարտի մեկի» քրեական գործով մեղադրվում է ՀՀ սահմանադրական կարգը տապալելու համար: Սահմանադրական կարգը տապալելու համար մեղադրվում են նաեւ ՀԱՊԿ նախկին գլխավոր քարտուղար Յուրի Խաչատուրովը, ՀՀ պաշտպանության նախկին նախարարներ Միքայել Հարությունյանը եւ Սեյրան Օհանյանը։
