ՀՀ տրանսպորտի, կապի եւ տեղեկատվական տեխնոլոգիաների նախարար Հակոբ Արշակյանը կոչ է անում կառավարության ծրագրում միայն թվեր չփնտրել, այլ ուշադրություն դարձնել առաջ քաշված թեզերին: Կառավարության նիստից հետո լրագրողների հետ ճեպազրույցում նախարարը ներկայացված ծրագիրը բնութագրեց որպես նախաձեռնողական եւ ռիսկ վերցնելու ծրագիր:
Դիտարկմանը, թե կառավարության ծրագրում թվեր չկան, նախարարն արձագանքեց. «Թվեր քննարկվել են եւ թվեր առաջադրվել են, թե ինչ ձեւաչափով դրանք կհրապարակվեն կամ ոչ, այս պահին կդժվարանամ պատասխանել: Մեր ծրագիրը ես կբնութագրեի նախաձեռնողական, ռիսկ վերցնելու եւ իրականացնելու ծրագիր: Այս տեսլականներն ամբողջությամբ պարփակված են ծրագրում ու կխնդրեի ոչ միայն թվեր, այլեւ թեզեր ման գալ ու տեսնել՝ ինչպիսի տեսլական ունի ծրագիրը ՀՀ զարգացման հետ կապված»:
Հարցին, թե ինչի՞ վրա հիմնվելով կարող է պնդել, որ ծրագիրը հեղափոխական է, նախարարը նշեց, որ կոնկրետ իրենց մասով կառավարությունը բարձր տեխնոլոգիաները եւ ռազմարդյունաբերությունը դիտարկում է որպես գերակա ճյուղ եւ ստեղծվում է առանձին գերատեսչություն. «Դուք դա առաջիկայում թվային տեսքով կտեսնեք»:
