Այսուհետ Ֆրանսիայի դպրոցական ծրագրում երեխաներին ուսուցանում են տարբերել կեղծ տեղեկատվությունը: Այդ մասին Ֆրանսիայի ԱԳՆ-ի կազմակերպած մամլո շրջագայության շրջանակներում Հայաստանից ժամանած լրագրողներին պատմել է Մեդիա եւ տեղեկատվական կրթության կենտրոնի (CLEMI) տնօրեն Սերժ Բարբյեն:
Կենտրոնը հիմնադրվել է 35 տարի առաջ, այսինքն՝ դեռեւս այդ ժամանակ գոյություն ուներ գիտակցումը, որ երիտասարդ սերնդին անհրաժեշտ է սովորեցնել տարբերել ԶԼՄ-ներում կեղծ եւ ճշմարիտ հրապարակումները: Այդ խնդիրը հատուկ նշանակություն է ստացել «Շարլի Էբդո» խմբագրության վրա հարձակումից հետո: «Մեր աշխատանքի նպատակն է ձեւավորել դպրոցահասակների քննադատական մտածողությունը, չէ որ քննադատական մոտեցումը քաղաքացիական առողջ դիրքորոշման գրավականն է»,-նշել է կենտրոնի տնօրենը: CLEMI-ում տարբեր առարկաներ դասավանդողներ են վերապատրաստվում, քանի որ ուսուցումը դպրոցական կոնկրետ առարկայի կողմից կազմակերպված չէ, այսինքն՝ «ապատեղեկատվության բացահայտման» տարրերը ներառված են տարբեր առարկաներում՝ քիմիայից մինչեւ ֆիզիկա:
Բացի այդ, ամեն տարի Ֆրանսիայի դպրոցներում անցկացվում է ԶԼՄ-ների եւ տեղեկատվության շաբաթը, որի շրջանակներում ԶԼՄ-ների ներկայացուցիչները հանդիպում եւ զրուցում են դպրոցականների հետ: Քանի որ ծրագիրը պարտադիր է դարձել բոլորովին վերջերս, եւ կրթական բարեփոխումներն այդ ոլորտում շարունակվում են, ոչ բոլոր դպրոցականներն ունեին հնարավորություն մասնակցել դրանում: Սակայն հետազոտության արդյունքները ցույց են տվել, որ երեխաների եւ դեռահասների ավելի քան 60 տոկոսը ձեռք է բերել Համացանցում նորությունների վերաբերյալ քննադատական մոտեցման հմտություններ: