Մենք կառավարության ծրագրի քննարկումների փուլում ենք, կունենանք ամբողջական քննարկում, մեր կարծիքը կասենք: Այս մասին, այսօր՝ փետրվարի 8-ին, ԱԺ-ում լրագրողների հետ զրույցում նշեց ԲՀԿ խմբակցության պատգամավոր Միքայել Մելքումյանը:
Նրա խոսքով, այստեղ կա քաղաքական կամքի ցուցաբերման հարց, կան ընդհանուր խնդիրներ, մասնագիտական խնդիրներ. «Բաներ կան մեր մոտեցումներին համահունչ են, կան բաներ, որ մեր կարծիքները տարբեր են»:
Դիտարկմանը, որ կառավարության ծրագրում թվեր գրեթե չկան, Մելքումյանն արձագանքեց. «Թվեր էլ կան, թվեր էլ չկան: Մի քանի թիվ կա, օրինակ ՀՆԱ-ի 5 տոկոս աճ: Կա, որ արտահանման կշիռը ՀՆԱ-ում 2023 թվականին պետք է կազմի 43-45 տոկոս, հիմա 25 տոկոս է: Կա, որ դրված է հիմնական միջոցների կուտակման աստիճանը ՀՆԱ-ում պետք է լինի 25 տոկոս»:
Բացի այդ, ըստ նրա, ծրագրում նշված է, որ 2023 թվականին ծայրահեղ աղքատությունը ընդհանրապես չպետք է լինի, իսկ դա 30-35 հազար դրամից պակաս եկամուտ ունեցողներն են:
Հարցին, թե կառավարության ծրագրում հեղափոխության շունչ զգո՞ւմ է, Մելքումյանը պատասխանեց. «Նայած, թե հեղափոխությունը ով ոնց է պատկերացնում: Մենք պետք է գնանք մի ճանապարհով, որ տեմպերը Հայաստանում արագանան: Պետք է փորձենք այնպիսի պայմաններ ստեղծել, որ բիզնես անելը, ներդրումների անվտանգություն ապահովելը իրական դառնա: Եկեք մի փոքր համբերենք»:
