ՄԱԿ-ը պետք է սկսի Ստամբուլում Սաուդյան Արաբիայի գլխավոր հյուպատոսությունում սաուդյան լրագրող Ջեմալ Խաշոգջիի սպանության պաշտոնական հետաքննությունը, հայտարարել է Թուրքիայի ԱԳ նախարար Մեվլյուտ Չավուշօղլուն, հաղորդում է Անադոլուն:
«ՄԱԿ-ը պետք է ստեղծի հանձնաժողով այդ հանցագործությունը բացահայտելու կամ հետաքննությունը նախաձեռնելու համար: Բնականաբար, ՄԱԿ-ի շրջանակներում հետաքննության համար անհրաժեշտ է Անվտանգության խորհրդի որոշումը, որը, ցավոք, քիչ հավանական է որոշ երկրների դիրքորոշման պատճառով: Սակայն հանձնաժողովի ստեղծումը կարող է ապահովվել գլխավոր քարտուղարի կամ մարդու իրավունքների հարցով հանձնակատարի կողմից»,-ասել է Չավուշօղլուն:
Դիվանագետը հիշեցրել է արտադատական սպանությունների հարցով ՄԱԿ-ի հատուկ զեկուցող Ագնես Քալամարի Թուրքիա այցի մասին, որի ընթացքում թուրքական իշխանությունները Խաշոգջիի գործով մանրամասն տեղեկություններ են հաղորդել նրան: «Զեկուցողի (ՄԱԿ-ի) եզրակացությունները համապատասխանում են մեր կողմից ավելի վաղ հնչեցրած տվյալներին. դա կարեւոր է»,-ընդգծել է Չավուշօղլուն:
Ընդ որում՝ նա նշել է, որ Քալամարի առաքելությունը պաշտոնական հետաքննություն չէ, եւ նրա նպատակը նախնական տեղեկատվություն հավաքագրելն է: Նրա խոսքերով՝ առաջիկայում Թուրքիան եւ մի շարք այլ երկրներ մտադիր են դիմել ՄԱԿ-ի շրջանակներում այդ գործի պաշտոնական հետաքննությունը սկսելու համար: «Կան մի շարք այլ հարցեր եւս, որոնց պատասխանները չեն տրվել: Սաուդյան Արաբիան ընդունել է, որ Ջեմալ Խաշոգջին սպանվել էր Ստամբուլում գլխավոր հյուպատոսությունում, իսկ նրա մարմինը մասնատվել էր: Սակայն մեզ դեռեւս հայտնի չէ՝ որտեղ են նրա մասունքները: Նրա ընտանիքը նույնպես իրավունք ունի այդ մասին տեղեկանալու: Բացի այդ, Սաուդյան Արաբիան դեռեւս հստակ չի ներկայացրել նրանց, ովքեր կատարել են այդ հանցագործությունը եւ ով է հրաման տվել»,-պարզաբանել է թուրքական դիվանագիտության ղեկավարը:
Չավուշօղլուն հավելել է, որ Էր-Րիադն, ի տարբերություն Թուրքիայի, հրաժարվում է միջազգային հանրությանը ներկայացնել Ջեմալ Խաշոգջիի սպանության սեփական հետաքննության մանրամասները:
