Մարտի 1-ի առավոտյան տեղի ունեցած դեպքերի վերաբերյալ իմ եւ Ռոբերտ Քոչարյանի գրքում նկարագրվածի մեջ կան տարբերություններ, ինչի մասին կասեմ, որ դա ընդամենը ֆորմատի տարբերություններ են։ Այս մասին, այսօր՝ փետրվարի 9-ին, մամուլի ասուլիսի ժամանակ նշեց ՀՀ երկրորդ նախագահ Ռոբերտ Քոչարյանի պաշտպան Հայկ Ալումյանը:
«Մի բան է, որ գրքում մի քանի էջի մեջ նկարագրված են իրադարձություններ, մեկ այլ բան է, որ դրանց վերաբերյալ պաշտպանը մի քանի նախադասությամբ պետք է մեկնաբանություն անի: Իհարկե, տարբերություններ կլինեն: Ես որոշել եմ պարզություն մտցնել այս հարցի մեջ։ Հակասություն չկա եւ իրողությունը հետեւյալն է, է, որ մարտի 1-ի առավոտվա ոստիկանական գործողության նկատմամբ եղել է պայմանավորվածություն, որ որեւէ բռնություն, կոշտ հակամարտություն Ազատության հրապարակում գտնվողների նկատմամբ չպետք է լինի: Այնտեղ պետք է կատարվեր զննում, քանի որ կար տեղեկատվություն, որ Ազատության հրապարակում հավաքված անձանց մոտ առկա են զենքեր, ընդհուպ մարտական ինքնաձիգեր եւ մարտական նռնակներ։ Առավոտյան ոստիկանությունը մոտեցել է, որ կատարի զննություն, սակայն երբ նրանք մոտեցել են, ցուցարարները նախօրոք զգուշացված են եղել եւ երբ նրանք հայտարարել են իրենց գալու նպատակների մասին, ոստիկանների նկատմամբ քարեր են նետվել: Ոստիկանությունը ստիպված է եղել ուժ կիրառել եւ ցրել այնտեղ գտնվող անձանց»,-հայտարարեց Հայկ Ալումյանը:
Նա նշեց, որ այդ մասին Ռոբերտ Քոչարյանն իմացել է միայն մյուս օրը առավոտյան շուտ, երբ եկել է աշխատանքի. «Եթե որեւէ տարբերություն կնկատեք պաշտպանի կողմից եւ անձամբ պարոն Քոչարյանի կողմից ասվածի միջեւ, ապա խնդրում եմ՝ հիմք ընդունեք այն, ինչ ասվել է պարոն Քոչարյանի կողմից, որովհետեւ մենք անմիջականորեն այդ իրադարձությունների ականատեսը չենք եղել եւ հնարավոր են որոշակի տարբերություններ»:
Նշենք, որ ՀՀ վերաքննիչ քրեական դատարանը՝ դատավոր Մնացական Հարությունյանի նախագահությամբ փետրվարի 7-ին որոշում էր կայացրել մերժել ՀՀ երկրորդ նախագահ Ռոբերտ Քոչարյանի պաշտպանների բողոքն ու անփոփոխ թողնել Քոչարյանի կալանքի ժամկետը երկարաձգելու առաջին ատյանի դատարանի որոշումը։
Հիշեցնենք, որ Երեւան քաղաքի ընդհանուր իրավասության դատարանի դատավոր Արթուր Մկրտչյանը հունվարի 18-ին բավարարել էր Հատուկ քննչական ծառայության քննիչի միջնորդությունը՝ Ռոբերտ Քոչարյանին կալանքի տակ պահելու ժամկետը երկարացնելու վերաբերյալ եւ մերժել՝ պաշտպանների միջնորդությունը Ռոբերտ Քոչարյանի նկատմամբ որպես խափանման միջոց ընտրված կալանքն այլընտրանքային խափանման միջոց գրավով փոխարինելու մասին: Այս որոշումը պաշտպանական կողմը բողոքարկել էր ՀՀ վերաքննիչ քրեական դատարանում։ Նշենք, որ Ռոբերտ Քոչարյանն առաջին անգամ կալանավորվել է 2018թ. հուլիսի 27-ին՝ Երեւան քաղաքի ընդհանուր իրավասության դատարանի դատավոր Վաչե Մարգարյանի որոշմամբ։ Օգոստոսի 13-ին այս որոշումը բեկանել էր Վերաքննիչ քրեական դատարանի դատավոր Ալեքսանդր Ազարյանը՝ արձանագրելով, որ երկրորդ նախագահն անձեռնմխելի է։ Վճռաբեկ դատարանն էլ գործն ուղարկել էր Վերաքննիչ դատարան՝ նոր քննության։
Քոչարյանը երկրորդ անգամ կալանավորվել է 2018թ. դեկտեմբերի 7-ին Վերաքննիչ քրեական դատարանի դատավոր Ռուբիկ Մխիթարյանի որոշմամբ։
Երկրորդ նախագահը «Մարտի մեկի» քրեական գործով մեղադրվում է ՀՀ սահմանադրական կարգը տապալելու համար: Սահմանադրական կարգը տապալելու համար մեղադրվում են նաեւ ՀԱՊԿ նախկին գլխավոր քարտուղար Յուրի Խաչատուրովը, ՀՀ պաշտպանության նախկին նախարարներ Միքայել Հարությունյանը եւ Սեյրան Օհանյանը։