Հատկանիշներ կան, որոնցից կարող եմ ենթադրել, որ «մարտի 1»-ի գործով սահմանադրական կարգի տապալման մեղադրանքի թուլանալուն զուգընթաց ԱԱԾ-ն փորձելու է նոր բաներ փնտրել, որը հնարավոր լինի մեղսագրել պարոն Քոչարյանին, որ իրենց ֆիասկոն այդքան ցայտուն չերեւա: Այս մասին, այսօր՝ փետրվարի 9-ին, մամուլի ասուլիսի ժամանակ նշեց ՀՀ երկրորդ նախագահ Ռոբերտ Քոչարյանի պաշտպան Հայկ Ալումյանը:
Նա անդրադարձավ նաեւ «մարտի 1»-ի գործով ՀՀ առաջին նախագահ Լեւոն Տեր-Պետրոսյանի 1,5 ժամ տեւած հարցաքննությանը՝ վկայի կարգավիճակով. «Սա ձեւական հարցաքննություն է, թե ոչ, ես կկարողանամ կարծիք հայտնել, երբ ցուցմունքն ամբողջությամբ կկարդամ: Ես հիմա չեմ կարող ասել՝ ձեւական են կանչել հարցաքննության, թե ինչ-որ բաներ ցանկացել են ճշտել: Այո, հնարավոր է 1,5 ժամում այնպես հարցաքննել, որ ընդհանուր պատկերը վկան ներկայացնի»,-ընդգծեց Ալումյանը:
