News
Լրահոս
News
Երկուշաբթի
Փետրվար 18
Տեսնել լրահոսը

Փետրվարի 8-ին Ն.Ս.Օ.Տ.Տ. Գարեգին Երկրորդ Ծայրագույն Պատրիարք եւ Ամենայն Հայոց Կաթողիկոսը, ուղեկցությամբ Ավստրալիայի եւ Նոր Զելանդիայի հայոց թեմի առաջնորդ Գերաշնորհ Տ. Հայկազուն արքեպիսկոպոս Նաջարյանի եւ իր շքախմբի, Սիդնեյից մեկնել է Ավստրալիայի հայաշատ երկրորդ քաղաք` Մելբուռն, տեղեկացնում է Մայր Աթոռ Սուրբ Էջմիածնի տեղեկատվական համակարգը:

Փետրվարի 9-ի առավոտյան Ամենայն Հայոց Կաթողիկոսն այցելել է Մելբուռնի Սուրբ Աստվածածին հայկական եկեղեցի, որտեղ տեղի է ունեցել «Հրաշափառի» արարողություն:

Ամենայն Հայոց Կաթողիկոսին մեծ խանդավառությամբ դիմավորել են այս օրհնյալ առիթով եկեղեցում համախմբված Մելբուռնի հայ համայնքի ներկայացուցիչներ` առաջնորդությամբ հոգեւոր հովիվ Արժանապատիվ Տեր Խաչեր քահանա Հարությունյանի եւ եկեղեցու ծխական խորհրդի:

Աղ ու հացի արարողությունից հետո Վեհափառ Հայրապետը, օրհնելով ժողովրդին, թափորով, «Հրաշափառի» ներքո առաջնորդվել է եկեղեցի, ուր կատարվել է համատեղ աղոթք:

Այնուհետեւ ներկա հավատավոր ժողովրդի անունից Ամենայն Հայոց Կաթողիկոսի հովվապետական այցը Ավստրալիայի եւ Նոր Զելանդիայի հայոց թեմ եւ, մասնավորաբար, Մելբուռն ողջունել է Հայկազուն Սրբազանը` ընդգծելով Հայոց Հոր այցերի կարեւոր նշանակությունը հայ համայնքի համար եւ հրավիրելով Նորին Սրբությանն իր օրհնությունն ու պատգամը բերելու բարեպաշտ ժողովրդին:

Դիմելով հավատավոր հայորդիներին` Ամենայն Հայոց Կաթողիկոսն ուրախություն հայտնել է, որ Աստծո կամոք վերստին այցելել է նրանց՝ բերելու իր հայրական սերը, հայոց հոգեւոր կենտրոն Մայր Աթոռ Սուրբ Էջմիածնի օրհնությունները: Հայոց Հայրապետը հաստատել է, որ ուրախության նույն զգացումով օրեր առաջ հանդիպել է Սիդնեյում բնակվող հայորդիներին, նրանց հետ միասնաբար աղոթել եկեղեցու խնկաբույր հարկի ներքո, այցելել կրթական եւ բարեսիրական հաստատություններ, հանդիպումներ ունեցել երիտասարդների, տարեցների, ազգային կառույցների եւ քաղաքական կուսակցությունների ներկայացուցիչների հետ, հաղորդ դարձել ավստրալահայ համայնքում արձանագրված ձեռքբերումներին ու հաջողություններին:

Նորին Սրբությունը նշել է, որ Ավստրալիայում թեմական ու ծխական կյանքի աշխուժությունը, հոգեւոր-եկեղեցական անդաստանի բարեզարդությունը Աստծուց օրհնյալ պտուղներն են Ավստրալիայում բնակվող մեր ժողովրդի զավակների աստվածսիրության ու ազգանվեր կյանքի:

Հայոց Հայրապետն իր օրհնությունն ու գնահատանքն է փոխանցել նաեւ թեմական խորհրդին եւ բոլոր այն նվիրյալ անձանց, ովքեր միասնաբար ու նվիրումով աշխատանք են տարել հովվապետական այցելությունը Ավստրալիա ու հավատավոր հայորդիների հետ հանդիպումը կազմակերպելու համար:

Վերջում առ Աստված աղոթքով Ամենայն Հայոց Կաթողիկոսը մաղթել է, որ միշտ պայծառ ու շեն լինի Ավստրալիայի հայ համայնքը, առատանա նորանոր ձեռքբերումներով, եկեղեցաշեն ու ազգանպաստ հաջողություններով եւ աստվածային օրհնություններն ու երկնահեղ բարիքներն անպակաս լինեն հայորդիներից եւ նրանց ընտանիքներից:

Հայրապետական «Պահպանիչ» աղոթքից հետո ժողովուրդը հնարավորություն է ստացել համբուրելու Վեհափառ Հոր Աջը եւ նրանից ստանալու նվեր խաչիկներ իբրեւ օրհնություն Ս. Էջմիածնի:

«Հրաշափառի» արարողության ավարտին, եկեղեցու կից սրահում Ամենայն Հայոց Կաթողիկոսը հանդիպում է ունեցել «Ակինյան» եւ Համազգայինի «Մեսրոպ Մաշտոց» մեկօրյա վարժարանների աշակերտների հետ:

Երկու կրթօջախների տնօրենների բարիգալստյան ջերմ խոսքերից հետո աշակերտները հանդես են եկան փոքրիկ գեղարվեստական հայտագրով:

Այնուհետեւ մանուկներին իր հայրական օրհնությունն է բերել Ամենայն Հայոց Կաթողիկոսը` պատգամելով լինել մեր սուրբ նախնյաց արժանավոր ժառանգները, իրենց բարեջան եւ ուշիմ ուսումնառությամբ դառնալ ազգի նվիրյալ զավակներ` կերտելու հայոց բարօր ու պայծառ կյանքը:

Նորին Սրբությունը նաեւ իր օրհնությունն է բերել վարժարանների տնօրեն կազմին եւ մանկավարժներին` բարձրորեն գնահատելով մատաղ սերնդի հայեցի դաստիարակության գործում իրենց կողմից ներդրվող անդուլ ջանքերը, հանձնառությունն եւ նվիրումը:

Տպել
Կարդացեք նաև
Ամբողջը
Այսօր Հայաստանում նշվում է սիրահարների բարեխոս Սուրբ Սարգսի տոնը (ֆոտոռեպորտաժ)
Իր որդի Մարտիրոսի եւ տասնչորս քաջ մարտիկների հետ նա նահատակվել է հանուն քրիստոնեական հավատքի…
Կալկաթայի Հայոց մարդասիրական ճեմարանը հայտարարում է 7-ից մինչեւ 10 տարեկան աշակերտների ընդունելություն
Ընդունելության համար պահանջվում են հետեւյալ փաստաթղթերը…
Կիեւում նշել են հայկական Տեառնընդառաջի տոնը
Եկեղեցական արարողության ավարտից հետո նորանշանակ դեսպանը դիմել է հայկական համայնքի ներկայացուցիչներին…
Անթիլիասում Արամ Առաջինն ընդունել է Տիգրան Մանսուրյանին
Նա այցելելու է Թռչնոց Բույն, Հայոց ցեղասպանության որբերի «Արամ Պեզիքյան» թանգարան, Ս. Աստվածածին վանք եւ Դպրիվանք…
Գարեգին Բ կաթողիկոսը Սիդնեյում ընդունել է տեղի հայկական կազմակերպությունների ներկայացուցիչներին
Հանդիպման ընթացքում հայկական կազմակերպությունների ներկայացուցիչներն իրենց զորակցությունն են հայտնել Հայաստանյայց Առաքելական Եկեղեցուն...
Ավստրալիայում Գարեգին Բ-ն այցելել է ՀԲԸՄ «Ալեքսանդր» վարժարան և «Ալեքսանդր» տարեցների տուն
Ճշմարիտ հայրենասիրությունն այն աշխատանքն է, որ այսօր տարվում է համայնքի մանուկների հետ, որի շնորհիվ նրանք հասակ են առնում հայաշունչ, հայրենասեր, ազգասեր...
Ամենաշատ