Միջին եւ փոքր հեռահարության հրթիռների ոչնչացման պայմանագրից դուրս գալու մասին ԱՄՆ նախագահ Դոնալդ Թրամփի հայտարարությունը կհանգեցնի սպառազինության մրցավազքի, որում հաղթողներ չեն լինի: Այսպիսի կարծիք է պարունակվում The New York Times պարբերականի խմբագրական հոդվածում:
«Քիչ հավանական է, որ պայմանագիրը կպահպանվի՝ հաշվի առնելով ամերիկա-ռուսական հարաբերությունների վատթարացումը, չնայած ավելի ջերմ հարաբերություններ հաստատելու Թրամփի խոստումներին, ինչը դարձավ հատուկ դատախազ Մյուլլերի քննության պատճառը,- նշում է պարբերականը: - Այս համաձայնագրի անխուսափելի տապալումը սոսկ ուժգնացրեց այն մտավախությունները, որ ԱՄՆ-ն եւ Ռուսաստանը կհրաժարվեն 2010 թվականի ռազմավարական սպառազինությունների մասին պայմանագիրը երկարացնել, որը լրանում է 2021 թվականին եւ սահմանափակումներ է սահմանում միջուկային մարտագլխիկների, միջմայրցամաքային բալիստիկ հրթիռների եւ ծանր ռմբակոծիչների ծավալման վրա, ինչպես նաեւ որոշում է համաձայնագրի ստուգման եւ տեղեկությունների փոխանակման կարգը: Եթե այս համաձայնագիրը չլինի, ապա 1972 թվականից սկսած առաջին անգամ միջուկային զինանոցի չափերը ոչ մի բանով չի կարգավորվի, այսինքն՝ չեն լինի դրանց վրա սահմանված պարտադիր, ստուգման ենթակա սահմանափակումներ:
Թրամփի սպառնալիքները նոր միջուկային զինանոցի ստեղծման ծախսերի հարցում Ռուսաստանի գերազանցելու մասին եւ սպառազինության վերահսկման ռեժիմից հրաժարվելը պարբերականն անվանել է «վախեցնելու հիմար փորձ» եւ շեշտել, որ սպառազինության մրցավազքում «հաղթողներ չեն լինի»:
