ՀՀ գյուղատնտեսության նախարարի առաջին տեղակալ Գեղամ Գեւորգյանը Գյուղատնտեսության զարգացման միջազգային հիմնադրամի (IFAD) նախագահ Ժիլբեր Հունգբոյի հրավերով այսօր մեկնել է Իտալիայի Հանրապետություն` մասնակցելու Հիմնադրամի կառավարման խորհրդի 42-րդ նիստին, որն անց է կացվում «Գյուղական նորարարություն եւ ձեռնարկատիրություն» խորագրի ներքո:
Նիստի ընթացքում մասնավորապես կքննարկվեն գենդերային եւ սնուցման զգայուն արժեշղթայի զարգացմանը, սոցիալական ձեռնարկատիրության եւ նորարարության գլոբալ մարտահրավերների դիմակայմանը եւ գյուղատնտեսության հետագա զարգացման վրա նոր տեխնոլոգիաների ազդեցությանը վերաբերող մի շարք հարցեր, ինչպես նաեւ Հիմնադրամի գործունեության հետագա ուղղությունները: Կկազմակերպվեն ինտերակտիվ քննարկումներ տարբեր ոլորտների փորձագետների ներգրավմամբ, այլ միջոցառումներ:
