Այս ամբիոնից մեզ 2 օր շարունակ բացատրում էին, որ Հայաստանի քաղաքացին կդառնա երկրում տնտեսական հեղափոխության պիոները: Այս մասին փետրվարի 13-ին Ազգային ժողովում կառավարության գործունեության ծրագրի քննարկման ժամանակ ասաց «Բարգավաճ Հայաստան» կուսակցության պատգամավոր Նաիրա Զոհրաբյանը:
Ընդ որում՝ նա հարց տվեց, թե այդ դեպքում ո՞րն է լինելու կառավարության գործառույթը: «Թվային ցուցանիշները մեր քմահաճույքը չեն: Բայց կառավարությունը դրանցով հաշվետու է լինում ժողովրդի առաջ: Ես հասկացա, թե ինչու չկան «ճանապարհային քարտեզ» եւ գործիքներ. պարզվում է, որ ամեն ինչ կախված է քաղաքացիների գենետիկ կոդից, այն բանից, թե քաղաքացին արդյոք պատրա՞ստ է փոխել իր տնտեսական վարքագիծը: Համաձայն եմ, որ կառավարությունը դա չի կարող կանխագուշակել, քանի որ դա արդեն էզոթերիկայի ոլորտից է»,- ասաց պատգամավորը:
Զոհրաբյանի խոսքով՝ ներկայացված ծրագիրը չունի ռազմավարական եւ հայեցակարգային հիմքեր ու չի պատասխանում ամենակարեւոր հարցին՝ Հայաստանն առաջիկա 5 տարիներին ինչպիսի տնտեսական մոդել է ունենալու:
Պատգամավորը շեշտեց, որ հարցը, թե ով է պատասխանատվություն կրելու Հայաստանում տնտեսական հեղափոխության իրականացման համար, շարունակում է օդում կախված մնալ: