Եվրախորհրդարանը եւ ԵՄ Խորհուրդը նախապես համաձայնեցրել են գազային հրահանգներում կատարվող ուղղումները, հայտնում են ԵՄ Խորհրդի մամուլի ծառայությունից: Փաստաթղթում նշված է, որ համաձայնագիրը հիմա կփոխանցեն ԵՄ անդամ երկրների ներկայացուցիչներին հաստատելու համար, այն պետք է քվեարկության դրվի նաեւ Եվրախորհրդարանում, փոխանցում է ՌԲԿ-ն:
Ռումինիայի էներգետիկայի նախարար Անտոն Անտոնի խոսքով (հունվարի 1-ից այս երկիրն է նախագահում ԵՄ Խորհրդում), համաձայնագիրը «լրացնում է էներգետիկայի ոլորտում ԵՄ օրենսդրության բացը եւ ապահովում է ԵՄ ամբողջ տարածքում Էներգետիկ միության կանոնների հետեւողական պահպանումը»:
Եվրահանձնաժողովը 2017 թվականի նոյեմբերին էր առաջարկել գազային հրահանգներում ուղղումներ կատարել: Ուղղումների համաձայն՝ Երրորդ էներգափաթեթի պահանջները (արգելում է համատեղել գազի վաճառքի եւ փոխադրման գործունեությունը) պետք է տարածվեն երրորդ երկրներից ԵՄ-ով անցնող գազատարների վրա: Այսպիսի նախագծերին է վերաբերում նաեւ «Հյուսիսային հոսք-2»-ը, որի շինարարությունն արգելափակվել էր:
Բրյուսելում փետրվարի 8-ին տեղի է ունեցել հրահանգների նորմերի խստացման հարցերով քվեարկությունը: Սակայն ԵՄ մշտական ներկայացուցիչների խորհրդակցուևթյան ժամանակ Գերմանիան եւ Ֆրանսիան փոխզիջում են առաջարկել: Ուղղումների մեղմացված տարբերակը նախատեսում է, որ «Հյուսիսային հոսք-2» նախագծի իրականացումը չի արգելափակվի, սակայն հետագայում խողովակատարին ներկայացվող պահանջները կարող են խստացվել:
