Կյանքից վաղաժամ հեռացել է «Միքայելյան վիրաբուժական ինստիտուտ» ՓԲԸ նախագահ, առողջապահության նախարարության ազգային ինստիտուտի վիրաբուժական նեղ մասնագիտությունների ամբիոնի վարիչ, գիտությունների դոկտոր, պրոֆեսոր Համլետ Թամազյանը:
Համլետ Թամազյանը ծնվել է 1947թ. մայիսի 1-ին Հայկական ԽՍՀ Թումանյանի շրջանի Օձուն գյուղում, բանվորի ընտանիքում:
Նա 231 գիտական աշխատության, այդ թվում 12 մենագրության, 5 գյուտի, 4 մեթոդական ձեռնարկի հեղինակ է: Պրոֆեսոր Թամազյանը 8 դոկտորական ատենախոսության եւ 37 թեկնածուական թեզի գիտական ղեկավար է: Նրա ղեկավարությամբ 108 կլինիկական օրդինատորներ եւ ասպիրանտներ ստացել են իրենց հետդիպլոմային կրթությունը:
Բժշկական գիտությունը զարգացնելու եւ կադրեր պատրաստելու գործում ձեռք բերած հաջողությունների, բազմակողմանի եւ բեղմնավոր գործունեության, Սպիտակի երկրաշարժից տուժածներին վիրաբուժական բարձրորակ օգնություն ցույց տալու համար պրոֆեսոր Համլետ Թամազյանը պարգեւատրվել է «Պատվո նշան» շքանշանով եւ «Պատվոգրով» (1989թ.): Արցախի պատերազմական գործողությունների ժամանակ վիրավոր ազատամարտիկների վիրաբուժական օգնությունը բարձր որակով կազմակերպելու համար Լեռնային Ղարաբաղի Հանրապետության նախագահի հրամանով պարգեւատրվել է Արցախի «Մարտական ծառայություն» մեդալով (2000թ.):
Հայաստանի Հանրապետության անկախության հռչակման 18-րդ տարեդարձի առթիվ, առողջապահության զարգացման գործում ունեցած նշանակալի ավանդի համար ՀՀ Նախագահ Սերժ Սարգսյանի հրամանագրով պարգեւատրվել է Մխիթար Հերացու մեդալով:
2003թ. Լոռու եւ Տավուշի մարզերի ազգաբնակչության գերակշռող մասի ձայներով մեծամասնական կարգով ընտրվել է ՀՀ Ազգային ժողովի 3-րդ գումարման պատգամավոր:
Ամուսնացած էր: Ունի 2 զավակ եւ 5 թոռնիկ: