Մեծ Բրիտանիայում առգրավել են կոնֆետների խմբաքանակ, որոնք թմրանյութ էին պարունակում եւ «ակնհայտորեն նախատեսված» էին երեխաներին վաճառելու համար, տեղեկացնում է Lenta-ն՝ հղում կատարելով BBC News-ին։
Վտանգավոր կոնֆետները հայտնաբերվել են անգլիական Քենթ կոմսությունում։ Ինչպես տեղեկացրել են ոստիկանությունում, իրավապահները փետրվարի 12-ի երեկոյան կանգնեցրել են կասկածելի ավտոմեքենան Գրեյվզենդ քաղաքում։ Խուզարկության ժամանակ գտել են մի պայուսակ՝ մարմելադի փաթեթներով լի։ Գունավոր կոնֆետները պարունակել են թմրանյութեր, իսկ դրանց փաթեթավորումն ակնհայտորեն վկայում է այն մասին, որ սպառողները պետք է լինեին երեխաները, նշել են ոստիկանությունում։
Իրավապահները կալանել են մոտ 20 տարեկան մի տղամարդու։ Նրան կասկածում են վաճառելու նպատակով «Ա» դասի թմրանյութեր պահելու մեջ։ Բացի այդ, նրան մեղսագրվում է մեքենան արգելված նյութեր օգտագործած վիճակում վարելու մեղք։ Երիտասարդին քննության ընթացքում ազատ են արձակել։
Մեծ Բրիտանիայում «Ա» դասի թմրանյութերին են պատկանում կրեկը, կոկաինը, էքստազին, հերոինը, ԼՍԴ-ն, մետադոնը, մետամֆետամինը եւ հալյուցինածին սնկերը։
2018 թվականի նոյեմբերին տեղեկացվել էր, որ ԱՄՆ-ում հնգամյա տղան հայտնվել էր հիվանդանոցում այն բանից հետո, երբ Հելոուինի ժամանակ հարեւանների տներից որպես հյուրասիրություն քաղցրավենիք էր հավաքել։ Երեխան պատմել էր, որ իրեն վատ է զգացել, երբ կերել է ստացած հյուրասիրություններից մեկը՝ մարմելադե ատամիկները։ Բժիշկները նրա մեզի մեջ մետամֆետամին էին հայտնաբերել։