ՀՀ Տնտեսական մրցակցության պաշտպանության պետական հանձնաժողովի նախագահ Արտակ Շաբոյանը այսօր ընդունել է Արժույթի միջազգային հիմնադրամի պատվիրակությանը: Հանդիպման ընթացքում քննարկվել են մրցակցային իրավիճակի բարելավման, մեր երկրում հավասար մրցակցային պայմանների ապահովմանն ուղղված քայլերի իրականացման ընթացքն ու առաջիկա անելիքները:
Քննարկման օրակարգում էին նաեւ «Տնտեսական մրցակցության պաշտպանության մասին» ՀՀ օրենքի մի շարք դրույթներին եւ դրանց փոփոխություններին առնչվող հարցերը՝ միտված մեր երկրում գործունեություն իրականացնող տնտեսվարողների համար առավել բարենպաստ մրցակցային միջավայր ձեւավորելուն:
ՏՄՊՊՀ նախագահ Ա. Շաբոյանը գործընկերներին ներկայացրել է տնտեսական մրցակցության ոլորտում ունեցած ձեռքբերումները, անդրադարձել միջազգային հեղինակավոր կառույցների, մասնավորապես Համաշխարհային տնտեսական ֆորումի գնահատականներին, ըստ որի մեր երկիրը շուկայի կենտրոնացվածության աստիճանը բնութագրող ցուցանիշով բարելավել է դիրքերը միանգամից 9 կետով եւ այժմ գտնվում է 19-րդ հորիզոնականում՝ ընդգծելով, որ սա խիստ էական առաջընթաց ու ձեռքբերում է:
Ա. Շաբոյանը խոսել է նաեւ Արժույթի միջազգային հիմնադրամի պատվիրակությանը հետաքրքրող մի շարք այլ հարցերի, մասնավորապես մրցակցության բարելավման ուղղությամբ կատարված գործուն քայլերի ինչպես նաեւ առաջիկա ծրագրերի մասին:
ՏՄՊՊՀ նախագահը իր խոսքում ընդգծել է, որ Հանձնաժողովը կարեւորում է միջազգային կառույցների հետ ակտիվ համագործակցությունը եւ շարունակում է այս ուղղությամբ աշխատանքներ իրականացնել՝ տնտեսական մրցակցության ոլորտում միջազգային լավագույն փորձի կիրառման, օրենսդրության վերաբերյալ փորձագիտական գնահատականների ինչպես նաեւ մեր երկրում մրցակցային իրավիճակի բարելավմանն ուղղված քայլերի քննարկման նպատակով: