Ցերերայում կրիոհրաբուխների ժայթքման հետքերը գիտնականներին օգնել են ապացուցել, որ այդ գաճաճ մոլորակի մակերևույթի տակ գոյություն ունի սառցաշերտով պատված եւ խիտ աղաջրով լցված «գրեթե հավերժական» օվկիանոս: Նրա գոյության հավանական ժամկետները ներկայացվել են Geophysical Research Letters ամսագրում:
Ցերերայի առաջին լուսանկարները, որոնք 2015 թվականի մարտին արվել էին Dawn զոնդի կողմից, երկու արտասովոր կառույցներ էին բացահայտել, որոնք ոչ ոք չէր ակնկալում տեսնել. խորհրդավոր սպիտակ հետքեր Օկկատոր խառնարանում, որոնք խիտ աղաջրի հետեւանք էին եւ յուրահատուկ բրգային Ախունա լեռը, որը 4 կմ բարձրություն ունի, հայտնում է «ՌԻԱ Նովոստին»:
Հետագայում Dawn-ը եւ նրա գիտական թիմը պարզել են, որ իրականում Ախունան հին, արդեն հանգած կրիոհրաբուխ է, իսկ սպիտակ բծերը այլ հրաբուխների ժայթքումների հետքեր են: Բացի այդ մյուս շրջաններում գիտնականները հայտնաբերել են սառցաշերտեր, որոնք վկայում են, որ Ցերերայի մակերեւույթն անընդհատ թարմանում է, քանի որ այդ սառույցները պետք է վաղուց գոլորշիանային տիեզերք:
Նման բացահայտումները գիտնականների մոտ եթադրություններ են առաջացրել, որ գաճաճ մոլորակի ընդերքում կարող է թաքնված լինել սառած կամ սառցաշերտի տակ դեռ գոյություն ուենցող օվկիանոս՝ լցված յուրահատուկ աղաջրով կամ մաքուր ջրով, որը տաքանում է դեռ անհայտ ջերմության աղբյուրից: