ԱՄՆ Կոնգրեսի Ներկայացուցիչների պալատի անդամները կողմ են քվեարկել սահմանի անվտանգության մասին օրինագծին, որը թույլ կտա կանխել դաշնային կառավարության աշխատանքի հերթական մասնակի դադարեցումը («շաթդաուն»): Փաստաթուղթն ուղարկվել է երկրի նախագահ Դոնալդ Թրամփին, հայտնում է «Ամերիկայի ձայնը»:
Օրինագծով միջոցներ են հատկացվում ԱՄՆ եւ Մեքսիկայի սահմանի որոշ հատվածներում նոր պատնեշների տեղադրման համար, սակայն այդպես էլ չի բավարարվել պատի շինարարության համար 5,7 մլրդ դոլար հատկացնելու նախագահի պահանջը:
Դեմոկրատների կողմից վերահսկվող Ներկայացուցիչների պալատն աջակցել է բյուջեի օրինագծին, որով նախատեսվում է ավելի քան 300 մլրդ դոլարի հատկացում մի շարք նախարարությունների եւ գերատեսչությունների աշխատանքի ֆինանսավորման համար: Փաստաթղթին կողմ է քվեարկել 300 օրենսդիր, դեմ՝ 128:
Սպիտակ տնից խոստացել են, որ Թրամփն օրինագիծը կստորագրի, սակայն միաժամանակ կփորձի իր լիազորություններն օգտագործել պատի կառուցման ֆինանսավորման համար:
